ghafoor-haideri-nominated-for-deputy-chairman-senate

عبدالغفور حیدری ڈپٹی چیئرمین سینیٹ کے لیے نامزد

اسلام آباد: پاکستان ڈیموکریٹک موومنٹ (پی ڈی ایم) نے جے یو آئی کے عبدالغفور حیدری کو ڈپٹی چیئرمین سینیٹ کے لیے نامزد کر دیا۔

تفصیلات کے مطابق پی ڈی ایم نے غفور حیدری کو ڈپٹی چیئرمین نامزد کر دیا، غفور حیدری نے نامزدگی پر مولانا فضل الرحمان کا شکریہ ادا کیا۔

غفور حیدری نے کہا پی ڈی ایم اور مولانا کی توقعات پر پورا اتروں گا، یوسف گیلانی کی قیادت میں پی ڈی ایم کا پینل کامیاب ہوگا۔

پرویز خٹک کی جانب سے پیش کش پر انھوں نے کہا کہ جس حکومت کو اپوزیشن تسلیم نہیں کرتی، اس کی آفر کی کوئی حیثیت نہیں ہے، پی ڈی ایم مکمل طور پر متحد اور متفق ہے۔

ان کا کہنا تھا کہ حکومتی وزیر ڈوبتی کشتی کو بچانے کے لیے تاخیری حربے استعمال کر رہے ہیں۔

واضح رہے کہ آج حکومت نے بھی تُرپ کا پتا پھینک دیا تھا، اور سینیٹر عبدالغفور حیدری کو ڈپٹی چیئرمین سینیٹ کی پیش کش کر دی گئی تھی، اس سلسلے میں ان کے ساتھ چیئرمین سینیٹ صادق سنجرانی اور وفاقی وزیر پرویز خٹک نے ملاقات کی۔

پرویز خٹک نے کہا عبدالغفور حیدری کو آفر ہے کہ ہمارے ڈپٹی بن جائیں، سب کو فائدہ ہوگا، تاہم سینیٹر غفور حیدری نے حکومت کی پیش کش مسترد کر دی۔

دوسری طرف وزیر اعظم عمران خان نے بھی آج ایک اہم اجلاس میں ڈپٹی چیئرمین کی نامزدگی پر پارٹی رہنماؤں سے مشاورت کی، ڈپٹی چیئرمین سینیٹ کے لیے پی ٹی آئی پنجاب کے رہنما اعجاز چوہدری کے نام پر غور کیا گیا، اجلاس کے بعد ایک اہم حکومتی رہنما نے اعجاز چوہدری سے رابطہ بھی کیا۔

اس خبر پر اپنی رائے کا اظہار کریں

اپنا تبصرہ بھیجیں