changes-in-corona-who-new-threats

ڈبلیو ایچ او نے دنیا کو نئے خطرے سے آگاہ کردیا

عالمی ادارہ صحت کے ترجمان نے کہا ہے کہ نئے کورونا وائرس کی 3 تبدیل شدہ اقسام دنیا بھر میں پھیل رہی ہیں،”ڈبلیو ایچ او” نے وائرس کی صورتحال سے متعلق نئی رپورٹ گزشتہ روز جاری کی۔

رپورٹ کے مطابق وائرس کی تبدیل شدہ قسم جو سب سے پہلے برطانیہ میں دریافت ہوئی تھی، منگل تک دنیا کے111ممالک اور خطوں میں اس کی موجودگی کی تصدیق ہو چکی ہے، ممالک کی یہ تعداد گزشتہ ہفتے کے مقابلے میں5 زیادہ ہے۔

پہلی بار جنوبی افریقہ میں پائی جانے والی وائرس کی ایک اور تبدیل شدہ قسم کی تصدیق، گزشتہ ہفتے کے مقابلے میں 3 ممالک کے اضافے کے ساتھ اب 58 ممالک میں ہو چکی ہے۔

برازیل میں دریافت ہونے والی وائرس کی ایک اور تبدیل شدہ قسم گزشتہ ہفتے سے تین ملکوں کے اضافے کے بعد اب 32 ممالک تک پہنچ چکی ہے۔

رپورٹ کے مطابق یکم سے 7 مارچ تک دنیا بھر میں کورونا وائرس کے نئے کیسز کی تعداد 27 لاکھ 34 ہزار 381 رہی، جو ایک ہفتے قبل کے مقابلے میں 2 فیصد کا اضافہ ہے۔ یہ متاثرین کی تعداد میں اضافے کا مسلسل دوسرا ہفتہ ہے۔

بھارت میں جہاں متاثرین کی کُل تعداد دنیا میں دوسرے نمبر پر ہے، اضافے کی شرح 9 فیصد رہی۔ جبکہ تعداد کے لحاظ سے تیسرے نمبر کے ملک برازیل میں 11 فیصد اضافہ ہوا۔ اٹلی میں متاثرین کی تعداد میں اضافے کی شرح24 فیصد رہی۔

مذکورہ ہفتے وائرس سے ہونے والی اموات کی تعداد 60 ہزار 323 رہی جو ایک ہفتہ قبل کے مقابلے میں 6 فیصد کم ہے۔ ہفتہ واری لحاظ سے یہ کمی کا مسلسل پانچواں ہفتہ ہے۔

رپورٹ کے مطابق اب بھی یہ بات اہم ہے کہ صرف افراد ہی نہیں بلکہ پورا معاشرہ وائرس کے پھیلاؤ کے خلاف اقدامات کا نفاذ جاری رکھے۔

کیٹاگری میں : صحت

اس خبر پر اپنی رائے کا اظہار کریں

اپنا تبصرہ بھیجیں