الیکشن کمیشن نے صدارتی انتخاب کے لیے پارلیمنٹ اور چاروں صوبائی اسمبلیوں میں ڈالے گئے ووٹوں کا حتمی نتیجہ جاری کر دیا ہے۔
کمیشن کے اعلامیے کے مطابق صدارتی انتخاب کے لیے مجموعی طور پر 1044 ارکان نے ووٹ ڈالے جن میں سے نو ووٹ پریزائیڈنگ افسران نے مسترد کیے۔
الیکشن کمیشن کے مطابق آصف زرداری نے 411 ووٹ حاصل کیے جب کہ ان کے مدِ مقابل صدارتی امیدوار محمود خان اچکزئی 181 ووٹ حاصل کر سکے۔
اعلامیے کے مطابق پریزائیڈنگ افسران کی جانب سے پولنگ کا اصل ریکارڈ موصول ہونے پر سرکاری نتیجہ فارم 7 پر تیار کرکے وفاقی حکومت کو اتوار کو ارسال کردیا جائے گا۔
آصف زرداری پارلیمنٹ سے 255 ووٹ حاصل کر کے صدرِ پاکستان منتخب
پاکستان پیپلز پارٹی اور اتحادی جماعتوں کے صدارتی امیدوار آصف علی زرداری 255 ووٹ حاصل کر کے دوسری مرتبہ صدرِ پاکستان منتخب ہو گئے ہیں۔
آصف زرداری کے مدِ مقابل سنی اتحاد کونسل کے امیدوار محمود خان اچکزئی نے 119 ووٹ حاصل کیے۔
نومنتخب صدر آصف علی زداری اتوار کو اپنے عہدے کاحلف اٹھائیں گے اور ان سے یہ حلف چیف جسٹس قاضی فائز عیسیٰ لیں گے۔
سندھ اسمبلی: آصف زرداری 151 ووٹ لینے میں کامیاب
پیپلز پارٹی اور اتحادی جماعتوں کے صدارتی امیدوار آصف علی زرداری نے 151 ووٹ حاصل کیے ہیں جب کہ سنی اتحاد کونسل کے امیدوار محمود خان اچکزئی کو نو ووٹ ملے ہیں۔
سندھ اسمبلی میں مجموعی طور پر 162 میں سے 160 ارکان نے ووٹ کاسٹ کیے تھے۔
خیبر پختونخوا اسمبلی کا نتیجہ: محمود اچکزئی کو 91، آصف علی زرداری کو 17 ووٹ ملے
صدارتی انتخاب کے لیے خیبر پختونخوا اسمبلی میں مجموعی طور پر 109 ووٹ کاسٹ ہوئے جن میں سے 91 ووٹ محمود خان اچکزئی نے حاصل کیے۔
پاکستان پیپلز پارٹی اور اتحادی جماعتوں کے امیدوار آصف علی زرداری نے 17 ووٹ حاصل کیے ہیں۔
بلوچستان اسمبلی میں کل 62 میں سے 47 ووٹ کاسٹ ہوئے
بلوچستان اسمبلی میں کل 62 میں سے 47 ارکان نے صدارتی انتخاب کے لیے ووٹ کاسٹ کیا ہے۔
مسلم لیگ ن کے 17، پیپلزپارٹی کے 16 اور بی اے پی کے چھ، نیشنل پارٹی کے چار، اے این پی کے تین اور ایک آزاد رکن نے ووٹ ڈالا ہے۔
جمعیت علماءاسلام، حق دو تحریک، جماعت اسلامی اور بی این پی عوامی کے 17 ارکان نے صدارتی انتخاب کے لیے ووٹ کاسٹ نہیں کیا۔
16:19
سندھ اسمبلی: 162 میں سے 160 ارکان نے ووٹ کاسٹ کیا
سندھ اسمبلی میں صدارتی انتخاب کے لیے پولنگ کے بعد ووٹوں کی گنتی کا عمل شروع ہو گیا ہے۔
سندھ اسمبلی میں 162 ارکان میں سے 161نے حقِ رائے دہی استعمال کیا ۔جماعت اسلامی کے واحد رکن محمد فاروق نے الیکشن کا بائیکاٹ کیا۔
گرینڈ ڈیموکریٹک الائنس (جی ڈی اے) کے تین ارکان نے حلف نہیں اٹھایا جب کہ جماعت اسلامی کے رکن حافظ نعیم الرحمان اور انتقال کرنے والے پیپلز پارٹی کے رکن عزیز جونیجو کا نوٹی فیکشن جاری نہیں ہوا ۔
مخصوص نشست پر ایم کیو ایم کے کامیاب ہونے والے رکن نے بھی اب تک حلف نہیں اٹھایا۔
