اسلام آباد: وفاقی وزیر داخلہ محسن نقوی نے اسلام آباد سیف سٹی ہیڈ کوارٹرز کا دورہ کیا اور ایک اعلیٰ سطح کے اجلاس کی صدارت کی۔ اس موقع پر انہوں نے سیف سٹی کو جدید ترین ‘کیپٹل سمارٹ سٹی’ میں تبدیل کرنے کے منصوبے پر ہونے والی پیش رفت کا تفصیلی معائنہ کیا۔
وفاقی وزیر نے ہیڈ کوارٹرز میں جاری تزئین و آرائش اور سسٹم کی اپ گریڈیشن کے کاموں کا جائزہ لیا۔ انہوں نے ہدایت کی کہ منصوبے کو عالمی معیار کے مطابق جلد از جلد مکمل کیا جائے۔محسن نقوی نے اعلان کیا کہ سیف سٹی کے دائرہ کار کو بڑھاتے ہوئے تمام متعلقہ اداروں کو ایک ہی پلیٹ فارم پر اکٹھا کیا جائے گا۔ اس اقدام کا مقصد شہر کی سیکیورٹی اور انتظامی معاملات کو مربوط بنانا ہے۔
وزیر داخلہ کا کہنا تھا کہ “یہ پراجیکٹ اسلام آباد کے شہریوں کو محفوظ اور پرسکون ماحول فراہم کرنے کی جانب ایک اہم سنگ میل ہے۔” انہوں نے واضح کیا کہ جدید ٹیکنالوجی کی مدد سے جرائم پر قابو پانا آسان ہو جائے گا۔
سیف سٹی کو سمارٹ سٹی میں بدلنے کے اس اقدام سے نہ صرف نگرانی کا عمل بہتر ہوگا بلکہ ٹریفک مینجمنٹ اور ہنگامی امداد کے نظام میں بھی انقلابی تبدیلی آئے گی۔
