لاہور :وزیراعلیٰ پنجاب مریم نواز نے عید الاضحیٰ کے موقع پر شہریوں کو ٹرانسپورٹرز کی جانب سے اضافی کرایوں کی وصولی (اوورچارجنگ) سے بچانے کے لیے گرینڈ آپریشن کا حکم دے دیا ہے۔ انہوں نے صوبے بھر کے تمام بس سٹینڈز پر منظور شدہ کرایہ نامے نمایاں جگہوں پر آویزاں کرنا لازمی قرار دے دیا ہے۔
وزیراعلیٰ پنجاب نے صوبے کے تمام ڈپٹی کمشنرز (DCs) اور ڈی پی اوز (DPOs) کو سخت ترین ہدایات جاری کرتے ہوئے کہا ہے کہ مسافروں کی جیبوں پر ڈاکا ڈالنے والے ٹرانسپورٹرز سے کوئی رعایت نہ برتی جائے۔ احکامات کے مطابق، اوورچارجنگ کرنے والی بس کا روٹ پرمٹ اور متعلقہ بس سٹینڈ کا اجازت نامہ فوری طور پر منسوخ کر دیا جائے گا۔
اس کے علاوہ، مریم نواز نے عید کے موقع پر مسافروں کے محفوظ سفر کو یقینی بنانے کے لیے فٹنس سرٹیفکیٹ کے بغیر چلنے والی ہر قسم کی پبلک ٹرانسپورٹ کو بھی فوری طور پر بند کرنے کی ہدایت کی ہے۔ انہوں نے انتظامیہ کو پابند کیا ہے کہ وہ خود بس اڈوں پر جا کر کرایوں کی نگرانی کریں تاکہ عید پر گھر جانے والے شہریوں کو کسی پریشانی کا سامنا نہ کرنا پڑے۔
