ممبئی: بالی ووڈ کے نامور اور لیجنڈری اداکار امیتابھ بچن نے کہا ہے کہ 83 برس کی عمر میں بھی سرگرم رہنا اور کام جاری رکھنا زندگی کا اصل مقصد ہے۔
اپنے ذاتی بلاگ میں انہوں نے لکھا کہ اس عمر میں جسمانی طور پر کمزوری کے باوجود کام کرنا ان کے لیے سب سے اہم چیز ہے اور وہ اسے زندگی کا حقیقی جوہر سمجھتے ہیں۔
83 سالہ اداکار کے مطابق کام ہی زندگی کی اصل روح ہے، چاہے وہ تخلیقی ہو یا جسمانی نوعیت کا، اور مسلسل مصروف رہنا انسان کو آگے بڑھنے میں مدد دیتا ہے۔
انہوں نے مزید کہا کہ صبح کے اوقات تخلیقی سوچ کے لیے بہترین ہوتے ہیں، تاہم ان کے نزدیک سب سے اہم چیز کام ہی ہے۔ ان کا کہنا تھا کہ “کام زندگی کا جوہر ہے، اور اس عمر میں بھی کام کرتے رہنا سب سے ضروری ہے۔”
اس سے قبل فروری میں بھی امیتابھ بچن نے کہا تھا کہ وہ اس وقت تک کام کرتے رہیں گے جب تک وہ قابل ہیں، کیونکہ فارغ رہنے سے منفی خیالات جنم لے سکتے ہیں۔
