گزشتہ 8 سال دنیا کی تاریخ کے گرم ترین سال ثابت ہوئے ہیں جس سے عالمی سطح پر درجہ حرارت میں ڈرامائی اضافے کا اندازہ ہوتا ہے۔
یہ بات یورپی یونین کے موسمیاتی ادارے کی جانب سے بتائی گئی۔
Copernicus کلائیمٹ چینج سروس کے مطابق 2022 میں اوسط درجہ حرارت اتنا تھا جو اسے 19 ویں صدی کے بعد سے مرتب کیے جانے والے موسمیاتی ریکارڈ کے مطابق اب تک کا 5 واں گرم ترین سال بنانے کے لیے کافی تھا۔
رپورٹ میں بتایا گیا کہ 2022 کے دوران پاکستان اور شمالی بھارت میں موسم بہار کے دوران 2 ماہ طویل ہیٹ ویو کے دوران درجہ حرارت 40 ڈگری سینٹی گریڈ سے تجاوز کرگیا تھا۔
اسی طرح پاکستان میں سیلاب کے نتیجے میں 3 کروڑ 30 لاکھ افراد متاثر ہوئے جبکہ اربوں ڈالرز کا نقصان ہوا۔
رپورٹ کے مطابق فرانس، برطانیہ، اسپین اور اٹلی میں گزشتہ سال اوسط درجہ حرارت میں ریکارڈ اضافہ ہوا جبکہ یہ مجموعی طور پر یورپ کا دوسرا گرم ترین سال ثابت ہوا۔
رپورٹ میں مزید بتایا گیا کہ زمین کے قطبی حصوں میں بھی گزشتہ سال درجہ حرارت میں ریکارڈ اضافہ دیکھنے میں آیا۔
رپورٹ کے مطابق 2022 کے دوران زمین کی فضا میں کاربن ڈائی آکسائیڈ اور میتھین جیسی گیسوں کی مقدار میں اضافے کا سلسلہ جاری رہا۔
یہ گیسیں عالمی درجہ حرارت میں اضافے میں اہم کردار ادا کررہی ہیں اور ان کے اخراج میں کوئی کمی دیکھنے میں نہیں آرہی۔
