چیچہ وطنی۔ 04 اپریل (اے پی پی):ڈپٹی کمشنرساہیوال سمیع اللہ فاروق نے پٹرولیم مصنوعات کی قیمتوں میں حالیہ اضافے کے اثرات سے عوام کو ممکنہ حد تک محفوظ رکھنے کے لیے ٹرانسپورٹرز ایسوسی ایشن کے نمائندہ وفد کے اجلاس کی صدارت کی جس میں ڈی پی او محمد عثمان ٹیپو، سیکرٹری آر ٹی اے واصف یاسین، ٹریفک پولیس افسران اور ٹرانسپورٹرز کی بڑی تعداد نے شرکت کی۔اجلاس سے خطاب کرتے ہوئے ڈپٹی کمشنرسمیع اللہ فاروق نے کہا کہ پٹرولیم مصنوعات کی قیمتوں میں حالیہ اضافہ عالمی سطح پر پیدا ہونے والی صورتحال، خصوصا آبنائے ہرمز کی بندش جیسے عوامل کا نتیجہ ہے جس میں حکومت کا کوئی براہِ راست عمل دخل نہیں۔
انہوں نے واضح کیا کہ حکومت عوامی مفاد کو مدنظر رکھتے ہوئے فیول پرائسز میں اضافے کا مکمل بوجھ ٹرانسپورٹرز پر منتقل نہیں کرنا چاہتی اور پٹرولیم مصنوعات کی قیمتوں میں اضافے کے بعد کرایوں میں مناسب ردوبدل ٹرانسپورٹرز کا حق ہے لیکن اسے جواز بنا کر کرایوں میں مرضی کا اضافہ ہرگز برداشت نہیں کیا جا سکتا ۔
ڈپٹی کمشنر سمیع اللہ فاروق نے حکومتی کفایت شعاری پالیسی پر بھی روشنی ڈالی اور کہا کہ موجودہ مشکل معاشی حالات میں تمام طبقات کو مشترکہ طور پر ذمہ داری کا مظاہرہ کرنا ہوگا۔ اس موقع پر ٹرانسپورٹرز نے ضلعی انتظامیہ کے ساتھ ہر ممکن تعاون کی مکمل یقین دہانی بھی کروائی۔ اجلاس میں ٹرانسپورٹرز نے درپیش مسائل سے بھی پیش جنہیں ترجیحی بنیادوں پر حل کیے جانے کی یقین دہانی کروائی گئی۔
