اسلام آباد۔5اپریل (اے پی پی):اسلام آباد کیپٹل ٹیریٹری (آئی سی ٹی) پولیس نے مسیحی برادری کے ایسٹر کے تہوار کے لیے جامع سکیورٹی اور ٹریفک انتظامات کے تحت وفاقی دارالحکومت میں 2 ہزار سے زائد اہلکار تعینات کیے ہیں۔پولیس حکام نے اتوار کو ’’اے پی پی ‘‘ کو بتایا کہ تہوار کے موقع پر گرجا گھروں اور اہم شاہراہوں پر ٹریفک کی روانی کو یقینی بنانے کے لیے ٹریفک پولیس کے اہلکار بھی تعینات کیے گئے ۔انہوں نے کہا کہ تمام پیٹرولنگ یونٹس اور خصوصی دستے سکیورٹی کو برقرار رکھنے کے لیے مختلف علاقوں میں فرائض سرانجام دے رہے ہیں۔
ایس ایس پی آپریشنز قاضی علی رضا نے اس حوالہ سے کہا ہے کہ ایسٹر پر سخت حفاظتی انتظامات کیے گئے ہیں۔ انہوں نے مزید کہا کہ گرجا گھروں میں داخلے کی اجازت جسم کی مکمل تلاشی کے بعد ہی دی جائے گی۔انہوں نے پولیس اہلکاروں کو ہائی الرٹ رہنے، اردگرد اور مشکوک افراد پر کڑی نظر رکھنے اور محفوظ ماحول کو یقینی بنانے کی ہدایت کی۔انہوں نے اس بات پر زور دیا کہ اہلکارعبادت کیلئے آنے والوں کے ساتھ شائستگی اور احترام سے پیش آئیں۔انہوں نے کہا کہ اس موقع پر اقلیتوں کے حقوق کے تحفظ اور امن و امان کو برقرار رکھنے کے لیے تمام دستیاب وسائل بروئے کار لائے جارہے ہیں۔
