اسلام آباد۔17مئی (اے پی پی):ضلعی انتظامیہ اسلام آباد نےاعلان کیا ہے کہ وفاقی دارالحکومت میں انسداد پولیو مہم کل پیر سے شروع کی جائے گی جس کے دوران پانچ سال تک کی عمر کے تمام بچوں کو پولیو سے بچاؤ کے قطرے پلائے جائیں گے۔محکمہ صحت کے حکام نے والدین پر زور دیا ہے کہ وہ مہم کے دوران اپنے بچوں کو لازمی طور پر پولیو ویکسین پلائیں، کیونکہ بار بار دی جانے والی خوراک بچوں میں وائرس کے خلاف قوتِ مدافعت کو مزید مضبوط بناتی ہے۔
انتظامیہ کے مطابق پولیو ٹیمیں اسلام آباد کے مختلف علاقوں میں گھر گھر جا کر، مراکزِ صحت اور مقررہ مقامات پر بچوں کو پولیو کے قطرے پلائیں گی۔ والدین سے کہا گیا ہے کہ وہ محکمہ صحت کے عملے سے مکمل تعاون کریں اور اس بات کو یقینی بنائیں کہ پانچ سال تک کی عمر کا ہر بچہ ویکسین سے مستفید ہو۔حکام نے واضح کیا کہ وہ بچے بھی ہر مہم میں پولیو کے قطرے ضرور پئیں جنہیں پہلے متعدد بار ویکسین دی جا چکی ہو، کیونکہ اضافی خوراکیں بیماری کے خلاف تحفظ میں اضافہ کرتی ہیں۔
انتظامیہ کا کہنا ہے کہ انسداد پولیو مہم کا مقصد وائرس کا مکمل خاتمہ اور بچوں کو عمر بھر کی معذوری سے محفوظ رکھنا ہے۔حکام نے شہریوں سے اپیل کی کہ وہ پولیو ٹیموں کا ساتھ دیں اور ویکسینیشن کی اہمیت کے بارے میں آگاہی پھیلانے میں اپنا کردار ادا کریں۔
