اسلام آباد۔21مئی (اے پی پی):وزیر مملکت برائے داخلہ طلال چوہدری نےکہا ہے کہ سی پیک منصوبہ اور جہاز سازی کے شعبہ میں تعاون پاکستان اور چین کی سٹریٹجک شراکت داری کی روشن مثال ہے، پاکستان اور چین کی دوستی کو دنیا کے سامنے ایک مثالی اور قابل تقلید ماڈل کے طور پر پیش کیا جائے گا۔جمعرات کو وزارت داخلہ سے جاری بیان کے مطابق پاک -چین سفارتی تعلقات کے 75 برس مکمل ہونے پر وزارتِ داخلہ میں خصوصی پرچم کشائی کی تقریب منعقد ہوئی۔
وزیر مملکت برائے داخلہ طلال چوہدری تقریب کے مہمانِ خصوصی تھے۔ تقریب میں وفاقی سیکرٹری داخلہ محمد خرم آغا، ایڈیشنل سیکرٹری اور وزارت داخلہ کے افسران اور حکام نے بڑی تعداد نے شرکت کی۔ اس سلسلے میں پاک سیکرٹریٹ آر بلاک میں دونوں ممالک کے پرچم لہرائے گئے۔ تقریب میں پاک -چین دوستی کے 75 سال مکمل ہونے پر شرکاء کی جانب سے نیک تمناؤں کا اظہار کیا گیا۔
تقریب سے خطاب کرتے ہوئے طلال چوہدری نے کہا کہ پاکستان اور چین نے ہر کڑے وقت میں ایک دوسرے کا بھرپور ساتھ دیا، اس مثالی دوستی کو ہم آگے بڑھائیں گے، مسلم لیگ (ن )کے ادوارِ حکومت میں ہمیشہ پاک -چین دوستی پروان چڑھی ہے۔ انہوں نے کہا کہ سی پیک منصوبہ اور جہاز سازی کے شعبہ میں تعاون پاکستان اور چین کی سٹریٹجک شراکت داری کی روشن مثال ہے، پاکستان اور چین کی دوستی کو دنیا کے سامنے ایک مثالی اور قابل تقلید ماڈل کے طور پر پیش کیا جائے گا۔تقریب کے اختتام پر مہمانِ خصوصی کی جانب سے یادگاری پودا بھی لگایا گیا۔
