اسلام آباد۔19مئی (اے پی پی):وفاقی وزیر پارلیمانی امور ڈاکٹر طارق فضل چوہدری نے کہا ہے کہ ایک بار پھر سیاسی ڈرامے کے ذریعے عوام کو گمراہ کرنے کی کوشش کی جا رہی ہے۔ کوئی بھی فرد چاہے اس کا عہدہ کوئی بھی ہو قانون سے بالاتر نہیں اور نہ ہی وہ سکیورٹی پروٹوکول سے مستثنیٰ ہے۔ منگل کو ایک بیان میں انہوں نے کہا کہ اڈیالہ جیل کی طرف جانے والے قافلے کو مکمل طور پر سکیورٹی اور انتظامی خدشات کے پیش نظر روکا گیا تھا تاکہ اسلام آباد اور پنجاب میں امن و امان کی کسی صورت حال سے بچا جا سکے۔ اسے خیبرپختونخوا کے عوام کی ’’توہین‘‘ میں بدلنا سیاسی پوائنٹ سکورنگ سے زیادہ کچھ نہیں۔ اصل سوال یہ ہے کہ کے پی کے حکومت مسلسل سیاسی تھیٹروں میں الجھنے کی بجائے صوبے کے عوام کو درپیش سنگین مسائل کے حل پر کب توجہ دے گی۔ انہوں نے کہا کہ پرامن احتجاج ہر اپوزیشن جماعت کا جمہوری اور آئینی حق ہے اور اس حق سے کوئی انکار نہیں کرتا۔
تاہم کسی بھی سیاسی گروہ کو یہ اختیار حاصل نہیں کہ وہ احتجاج اور دھرنوں کے نام پر پورے شہر کو یرغمال بنائے، سڑکیں بلاک کرے، روزمرہ کی زندگی مفلوج کرے اور عام شہریوں کے آئینی حقوق کو پامال کرے۔ اسلام آباد کے عوام ان رکاوٹوں کی سیاست کی وجہ سے بار بار مشکلات کا شکار ہیں، سڑکوں کی بندش، کاروباری نقصانات، سفری مشکلات اور عوام کو تکلیف کا سامنا ہے۔ انہوں نے کہا کہ عمران خان کی صحت کے حوالے سے مبالغہ آمیز دعوے سیاسی ہمدردی حاصل کرنے اور محاذ آرائی کے لیے بھی کیے جا رہے ہیں۔ اگر حقیقی قانونی یا طبی خدشات ہیں، تو عدالتیں اور متعلقہ ادارے ان کو حل کرنے کے لیے پوری طرح دستیاب ہیں۔ ہر معاملے کو ریاست اور قومی اداروں کے خلاف مہم نہ بنایا جائے۔ وزیر پارلیمانی امور نے کہا کہ بدقسمتی سے ایک مخصوص سیاسی جماعت ایسے وقت میں تقسیم، ایجی ٹیشن اور عدم استحکام کو فروغ دے رہی ہے جب پاکستان کو ذمہ داری، پختگی اور سیاسی استحکام کی سب سے زیادہ ضرورت ہے۔ پاکستان انتشار، دباؤ کے ہتھکنڈوں اور تیار کردہ بیانیے سے نہیں آئین کے احترام، قانون کی حکمرانی اور مضبوط اداروں کے ذریعے آگے بڑھے گا۔
