زاہد اکرم درانی نے ڈپٹی اسپیکر قومی اسمبلی کا حلف اٹھا لیا اس سے قبل وہ بلامقابلہ قومی اسمبلی کے ڈپٹی اسپیکر منتخب ہوئے تھے۔
زاہد اکرم درانی نے ڈپٹی اسپیکر قومی اسمبلی کا حلف اٹھا لیا ان سے اسپیکر قومی اسمبلی راجا پرویز اشرف نے حلف لیا۔
زاہد اکرم درانی جن کا تعلق جمعیت علمائے اسلام (ف) سے ہے بلامقابلہ ڈپٹی اسپیکر قومی اسمبلی منتخب ہوئے تھے۔
حلف اٹھانے کے بعد ڈپٹی اسپیکر زاہد اکرم درانی نے اظہار خیال کرتےہوئے کہا کہ میں اپنے قائد مولانا فضل الرحمان اور حکومت میں شامل تمام قائدین کا شکر گزار ہوں، ہماری جماعت نے ہمیشہ آئین قانون کی جنگ لڑی ہے اور یہ خدمت ہمیں وراثت میں ملی ہے۔
انہوں نے کہا کہ اس سے پہلے ڈپٹی اسپیکر نے آئین وقانون کی دھجیاں اڑائیں، سابق ڈپٹی اسپیکر نےاس کرسی کا مورال پامال کیا تھا، یہاں ایسے بھی لوگ ہیں جو منتخب وزیراعلیٰ سے بھی حلف نہیں لیتے ہیں۔
زاہد اکرم نے مزید کہا کہ ہمارے جنوبی اضلاع کے بہت سے مسائل ہیں، ہم جب اپوزیشن میں تھے تو مسائل کیلئے چیختے تھے، اب وزیراعظم سے خود بات کرینگے کیونکہ ہمارا اپنا وزیراعظم ہے۔
واضح رہے کہ سابق ڈپٹی اسپیکر قومی اسمبلی قاسم سوری نے اپنے خلاف تحریک عدم اعتماد پیش ہونے پر اپنے عہدے سے استعفیٰ دیدیا تھا۔
اس حوالے سے قاسم سوری نے سماجی رابطے کی ویب سائٹ ٹوئٹر پر اپنے پیغام میں کہا کہ قومی اسمبلی سےاستعفیٰ میری پارٹی کے وژن کی علامت ہے، استعفیٰ پارٹی کی شاندار وراثت سے وابستگی کی علامت ہے، استعفیٰ جمہوریت کے ساتھ اس کی وابستگی کی علامت ہے۔
