لندن : وزیراعظم شہباز شریف اقوام متحدہ کی جنرل اسمبلی کے77ویں اجلاس میں پاکستان کی نمائندگی کرنے کیلئے آج لندن سے امریکا پہنچیں گے۔
ذرائع کے مطابق 20ستمبرکو وزیراعظم اقوام متحدہ کے سیکریٹری جنرل کے استقبالیہ میں شرکت کریں گے، نیویارک میں موجودگی کے دوران وزیراعظم کی دیگر ممالک کے رہنماوں سے اہم ملاقاتیں ہوں گی۔
وزیراعظم آفس سے جاری شدہ شیڈول کے مطابق 20ستمبر کو وزیراعظم شہباز شریف کی فرانس کے صدر ایمانوئیل میخواں سے ملاقات ہوگی۔
20ستمبر کو وزیراعظم کی آسٹریا کے چانسلر، اسپین کے صدر کے علاوہ یورپی یونین کونسل کے صدر چارلس مائیکل سے ملاقاتیں ہوں گی۔
اس کے علاوہ وزیراعظم شہباز شریف ‘گلوبل فوڈ سکیورٹی سمٹ’ میں بھی شرکت کریں گے، 21ستمبر کو وزیراعظم کی آئی ایم ایف کی ایم ڈی، ورلڈ بینک کے صدر سے ملاقات ہوگی۔
شیڈول کے مطابق ترکیہ کے صدر کے علاوہ ایران کے صدر سے بھی وزیراعظم کی دوطرفہ ملاقات ہوگی وزیراعظم شہباز شریف اقوام متحدہ کی جنرل اسمبلی کے صدر سے بھی ملاقات کریں گے۔
21ستمبر کو وزیراعظم امریکہ کے صدر جو بائیڈن کی طرف سے عشائیہ میں شرکت کریں گے، وزیراعظم شہباز شریف 21 ستمبر کو ترکیہ کے صدر اور ان کی اہلیہ کے اعزاز میں ظہرانہ دیں گے اور فن لینڈ کے صدر سعالی نوسیتو سے بھی ملیں گے۔
22ستمبر کو وزیراعظم شہباز شریف کی مائیکرو سافٹ کے بانی بل گیٹس سے ملاقات کے علاوہ اقوام متحدہ کے سیکریٹری جنرل انتونیو گوتیرس سے ان کے دفتر میں ملیں گے۔
اس دورے کے موقع پر وزیراعظم شہباز شریف کی چین اور جاپان کے وزرائے اعظم سمیت ملائیشیا کے وزیراعظم اسماعیل صابری یعقوب سے بھی ملاقاتیں ہوں گی۔
وزیراعظم آفس سے جاری شدہ شیڈول کے مطابق 23ستمبر کو وزیراعظم شہباز شریف اقوام متحدہ کی جنرل اسمبلی سے خطاب کریں گے، وزیراعظم کی نوبل انعام یافتہ ملالہ یوسف زئی سے بھی ملاقات ہوگی۔
