مسلم لیگ ن کی نائب صدر مریم نواز کا کہنا ہےکہ پیٹرول کی قیمتیں عمران خان کے آئی ایم ایف سےکیےگئے معاہدےکے باعث بڑھاناپڑیں، آئی ایم ایف اب معاہدے کے لیے ناک سے لکیریں لگوا رہا ہے، عمران خان نے خزانہ خالی کردیا، آج پاکستان کے پاس کچھ نہیں۔
لاہور کے علاقےگرین ٹاؤن میں جلسے سے خطاب کرتے ہوئے مریم نواز کا کہنا تھا کہ عمران خان نے آئی ایم ایف سے معاہدہ کرکے برا کیا، پھر معاہدے کی خلاف ورزی کرکے اور برا کیا، آئی ایم ایف اب معاہدے کے لیے ناک سے لکیریں لگوا رہا ہے ، عمران خان نے خزانہ خالی کردیا ، آج پاکستان کے پاس کچھ نہیں ہے، وعدہ کرتی ہوں مسائل سے نکالنا ہماری ذمہ داری ہے۔
مریم نواز کا کہنا تھا کہ محنت کرکے نواز شریف اور شہباز شریف آپ کو بحرانوں سے نکالیں گے، حکومت کو پیٹرول اور ڈیزل کی قیمتیں دل پر پتھر رکھ کر بڑھانا پڑیں، انھوں نے سمجھا مریم نواز عوام میں نہیں نکلےگی، جب بھی عوام تکلیف میں ہوگی نوازشریف کی بیٹی نکلے گی، میں آلو پیاز کے ریٹ پتا کرنے آئی ہوں اور آپ کے ساتھ کھڑی ہوں گی، یہ مسائل ہمارے پیدا کردہ نہیں ہیں۔
نائب صدر ن لیگ کا کہنا تھا کہ فتنہ خان آپ کو جن مسائل میں چھوڑ کرگیا پوری محنت سےانہیں ختم کریں گے، اگر ن لیگ نے چیلنجز میں حکومت لے لی تو نمٹنا بھی آتا ہے، 2018 میں جب الیکشن چرا کر مسلط ہوا تو اس نے خزانے پربھی ہاتھ صاف کرلیا، فتنہ خان نے پاکستان کو سری لنکا بنانےکا پورا بندوبست کیا ہوا تھا، فتنہ خان کو دکھ ہےکہ پاکستان سری لنکا کیوں نہیں بنا۔
ان کا کہنا تھا کہ شہباز شریف نے آٹے پر چینی پر سبسڈی دی، فتنہ خان کو انگوٹھیوں کے بدلے فیکٹریوں کےگیٹ کھلوانا یاد تھا لیکن کارخانوں کے لیے تیل منگوانا یاد نہیں تھا، فتنہ خان نے تاریخ کا سب سے بڑا ڈاکا پنجاب کے عوام کے مینڈیٹ پر ڈالا، پنجاب 12 کروڑ عوام کا صوبہ ہے جس پر فرح گوگی کو مسلط کردیا گیا، ابراہیم مانیکا 4 سالوں میں ارب پتی ہوگیا، جو بھی ٹینڈر پاس ہوتا اس میں ابراہیم مانیکا کاحصہ جاتا۔
انہوں نے مزید کہا کہ ہمارے امیدواروں کو کہہ رہا ہے یہ پارٹی چھوڑ کر آئے ہیں جب کہ عمران خان کی پارٹی سے لوٹوں کو نکال دو تو کچھ نہیں بچتا، لوٹا وہ ہوتا ہے جو اپوزیشن چھوڑ کر حکومت میں آئے، ہمارےامیدوار وہ ہیں جو عمران کی حکومت چھوڑ کر اپوزیشن میں آئے۔
