پاک فوج کے ترجمان نے ایک بار پھر فوج کی سیاست میں مداخلت کی سختی سے تردید کرتے ہوئے کہا ہے کہ فوج پر مداخلت کا الزام لگانے والے ثبوت لائیں۔
پاک فوج کے ہیڈکوارٹر جی ایچ کیو میں پریس کانفرنس کرتے ہوئے ڈی جی آئی ایس پی آر میجر جنرل بابرافتخار نے بھارت کی جانب سے پاکستانی حدود میں داخل ہونے والے فلائنگ اوبجیکٹ کو مار گرانے سے متعلق کارروائی پر تفیصلی بات کی۔
پریس کانفرنس کے دوران صحافیوں نے موجودہ سیاسی صورتحال پر بھی سوالات کیے تو ڈی جی آئی ایس پی آر نے دوٹوک جواب دیا۔ انہوں نے کہا کہ فوج کا سیاست سےکوئی لینا دینا نہیں ہے اس معاملے میں مزید بحث نہ کی جائے
یہی سب کیلئے اچھا ہے۔
بابرافتخار نے کہا کہ سیاست کے سوال کا میں واضح جواب دے چکا ہوں انگلیاں اٹھانے والوں، دعویٰ کرنےوالوں سے پوچھیں فوج کا سیاست سےتعلق نہیں جو سوال اٹھا رہے ہیں ان سےسوال کریں۔
ڈی جی آئی ایس پی آر کا کہنا تھا کہ فوج پر مداخلت کا الزام لگانے والے ثبوت لائیں ماضی میں بھی الزامات کا کوئی ثبوت نہ لاسکے۔
