واشنگٹن : امریکی وزیر خارجہ مارکو روبیو نے پاکستان اور بھارت کے درمیان جنگ بندی برقرار رکھنےپرزور دیتے ہوئے کہا کہ دونوں ممالک میں براہ راست بات چیت کے حامی ہیں۔
تفصیلات کے مطابق امریکی وزیر خارجہ مارکو روبیو نے برطانوی ہم منصب ڈیوڈ لیمی اور جرمن چانسلر فریڈرش مرز سے ٹیلی فون پر الگ الگ گفتگو کی، جس میں پاک بھارت کشیدگی پر تبادلہ خیال کیا گیا۔
ڈیوڈ لیمی اور مارکو روبیو نے پاکستان اور بھارت پر زور دیا دونوں ممالک جنگ بندی برقرار رکھیں اور رابطے میں رہیں۔
امریکی وزیر خارجہ کا کہنا تھا کہ امریکا بھارت اور پاکستان کے درمیان براہِ راست مذاکرات کا حامی ہے اور دونوں مملک میں روابط بہتر بنانے کی مسلسل کوششوں کی حوصلہ افزائی کرتا ہے۔
گزشتہ روز امریکی صدر ٹرمپ نے مسئلہ کشمیر حل کرنے کی خواہش کا اظہار کیا تھا، پاکستان اور بھارت کے درمیان جنگ بندی کے بعد امریکی صدر نے سوشل میڈیا پر جاری پیغام میں کہا تھا کہ پاکستان اوربھارت کے ساتھ مل کرکام کروں گا اور دیکھوں گا کیا ‘ہزاروں سال بعد’ مسئلہ کشمیر کا کوئی حل نکل سکتا ہے۔
خیال رہے کہ بھارت کی جارحیت پر پاکستان نے منہ توڑ جواب دیا اور آپریشن بُنْيَان مَّرْصُوْص ( آہنی دیوار) کے دوران بھارت میں 10 سے زائد اہداف کو نشانہ بنایا۔
دونوں ممالک کے درمیان کشیدگی کے پیش نظر امریکا کی جانب سے جنگ بندی کیلئے دونوں ممالک کو ایک میز پر لایا گیا۔
