کراچی : سانحہ گل پلازہ کی تحقیقات کرنے والے جوڈیشل کمیشن میں اہم پیش رفت ہوئی ہے۔ پولیس سرجن ڈاکٹر سمیہ نے کمیشن کے سوالنامے کا تفصیلی جواب جمع کرا دیا ہے، جس میں واقعے کے متاثرین اور ہلاکتوں کی وجوہات سے متعلق لرزہ خیز حقائق سامنے آئے ہیں۔
پولیس سرجن کی رپورٹ کے مطابق، اس ہولناک سانحے میں زیادہ تر اموات شدید آگ اور دھوئیں کے باعث دم گھٹنے سے ہوئیں۔ رپورٹ میں واضح کیا گیا کہ جائے وقوعہ پر پھیلنے والا زہریلا دھواں فوری ہلاکتوں کا باعث بنا۔
ڈاکٹر سمیہ کی جانب سے جمع کرائے گئے جواب میں جانی نقصان کی تفصیلات درج ذیل ہیں۔ ہسپتال میں مجموعی طور پر 73 لاشیں اور انسانی باقیات لائی گئیں۔لائی گئی لاشوں میں سے صرف 7 لاشیں مکمل حالت میں تھیں، جبکہ 66 جلی ہوئی باقیات تھیں جن کی شناخت ایک مشکل مرحلہ تھا۔سانحہ کے فوراً بعد 8 زخمیوں کو طبی امداد کے لیے ہسپتال منتقل کیا گیا تھا۔
جوڈیشل کمیشن ان شواہد کی روشنی میں سانحے کے ذمہ داروں اور حفاظتی انتظامات میں کوتاہی کا تعین کر رہا ہے۔ پولیس سرجن کے اس بیان کو کیس میں کلیدی اہمیت حاصل ہے، جس سے جانی نقصان کی شدت اور نوعیت واضح ہو گئی ہے۔
