مورو: صدر آصف علی زرداری نے کہا ہے کہ ملک میں استحکام اور ترقی کے لیے تمام اداروں، بشمول اسٹیبلشمنٹ، کو مضبوط بنانا ضروری ہے، جبکہ معاشی خودمختاری اور زرعی شعبے کی جدید خطوط پر بہتری وقت کی اہم ضرورت ہے۔
مورو میں ایک عوامی اجتماع سے خطاب کرتے ہوئے صدر مملکت نے کہا کہ عوام کو معاشی طور پر مستحکم کرنا اور زراعت میں جدید ٹیکنالوجی کا فروغ دینا ملکی ترقی کے لیے ناگزیر ہے۔
علاقائی صورتحال پر گفتگو کرتے ہوئے آصف علی زرداری کا کہنا تھا کہ بھارت میں مسلمانوں پر ہونے والے مبینہ مظالم کو عالمی سطح پر مناسب توجہ نہیں دی گئی۔
President Asif Ali Zardari addressed a public gathering in Moro, Sindh, at the residence of Sindh Home Minister Zia-ul-Hassan Lanjar. The President also interacted with local notables and elected members of the area. pic.twitter.com/a3zm0Wjqnv
— The President of Pakistan (@PresOfPakistan) May 28, 2026
انہوں نے کہا کہ پاکستان نے بھارت کے ساتھ مختصر کشیدگی کے دوران بھرپور جواب دیا، جس میں طیارے گرانے کا واقعہ بھی شامل تھا، اور اس سے بھارت کو اپنی حقیقت کا اندازہ ہوگیا۔
صدر زرداری نے اس بات پر زور دیا کہ مؤثر حکمرانی اور ریاستی اداروں کا استحکام ملک کے بڑے چیلنجز ہیں، لہٰذا قومی یکجہتی کے ذریعے اداروں کو مزید مضبوط بنانا ہوگا۔
بعد ازاں صدر مملکت نے سندھ کے وزیر داخلہ ضیاء الحسن لنجار کی رہائش گاہ پر مقامی عمائدین اور منتخب نمائندوں سے ملاقات بھی کی۔
