کراچی / حیدرآباد: سندھ کے 9 اضلاع میں ضمنی بلدیاتی انتخابات کے لیے پولنگ کا عمل جاری ہے، جہاں ووٹرز اپنے حقِ رائے دہی کا استعمال کر رہے ہیں۔ الیکشن کمیشن کے شیڈول کے مطابق حیدرآباد، جامشورو، دادو اور سجاول سمیت تمام متعلقہ اضلاع میں ووٹنگ کا یہ عمل کسی وقفے کے بغیر شام 4 بجے تک جاری رہے گا۔
ترجمان الیکشن کمیشن کے مطابق، ان ضمنی معرکوں کے لیے نو اضلاع میں مجموعی طور پر 73 پولنگ اسٹیشنز قائم کیے گئے ہیں۔ سیکیورٹی خدشات کے پیشِ نظر انتظامیہ نے ان میں سے 59 پولنگ اسٹیشنز کو ‘انتہائی حساس’ قرار دیا ہے، جہاں امن و امان قائم رکھنے اور کسی بھی ناخوشگوار واقعے سے نمٹنے کے لیے پولیس اور دیگر قانون نافذ کرنے والے اداروں کے اضافی دستے تعینات کیے گئے ہیں۔
ان بلدیاتی انتخابات میں مجموعی طور پر 98 ہزار 808 ووٹرز اپنا نیا بلدیاتی نمائندہ منتخب کرنے کے لیے ووٹ ڈال رہے ہیں۔ پولنگ اسٹیشنز پر صبح سے ہی ووٹرز کی آمد کا سلسلہ شروع ہو گیا ہے اور انتظامیہ کی جانب سے پرامن پولنگ کو یقینی بنانے کے لیے سخت انتظامات کیے گئے ہیں۔
