کراچی: یونائیٹڈ بزنس گروپ (UBG) کے سربراہ ایس ایم تنویر نے ملک کی موجودہ معاشی صورتحال پر تشویش کا اظہار کرتے ہوئے کہا ہے کہ تاجر برادری اس وقت شدید مشکلات کا سامنا کر رہی ہے، تاہم معیشت کی بہتری کے لیے کوششیں جاری ہیں۔
ایس ایم تنویر نے بزنس کمیونٹی سے گفتگو کرتے ہوئے اہم نکات پر روشنی ڈالی۔ انہوں نے اعتراف کیا کہ صنعت کار اور تاجر طبقہ مشکل دور سے گزر رہا ہے، جس کے لیے ٹھوس اور پائیدار حکومتی اقدامات ناگزیر ہیں۔
ان کا کہنا تھا کہ عالمی منڈیوں میں پاکستانی مصنوعات کی رسائی کے لیے دیگر ممالک کے ساتھ فری ٹریڈ (آزاد تجارت) کے معاہدے ہونے چاہئیں تاکہ برآمدات میں اضافہ ہو سکے۔
یورپی یونین کی جانب سے ملنے والی تجارتی مراعات (GSP+) کے حوالے سے بات کرتے ہوئے ایس ایم تنویر نے کہا جی ایس پی پلس سٹیٹس کے حصول اور اسے برقرار رکھنے کے لیے سب نے مل کر محنت کی ہے۔ یہ مشترکہ کوششوں کا نتیجہ ہے جس سے ملکی صنعت کو سہارا ملا ہے۔
سربراہ یو بی جی نے اعادہ کیا کہ وہ معیشت کی بحالی کے لیے ہر سطح پر کام کر رہے ہیں۔ انہوں نے حکومت پر زور دیا کہ تجارتی رکاوٹیں دور کی جائیں تاکہ ملک میں کاروباری سرگرمیاں پروان چڑھ سکیں اور معاشی استحکام آ سکے۔
