لاہور/اسلام آباد: وفاقی دارالحکومت اسلام آباد، لاہور اور پنجاب کے دیگر اضلاع سمیت خیبر پختونخوا کے کئی علاقوں میں موسلادھار بارش ہوئی ہے، جس سے جہاں گرمی کا زور ٹوٹ گیا ہے وہیں میانوالی میں طوفان نے بڑی تباہی مچائی ہے۔
اسلام آباد، لاہور اور پنجاب کے میدانی علاقوں میں بادل برسنے سے موسم خوشگوار ہو گیا ہے۔ تاہم، میانوالی میں صورتحال تشویشناک رہی جہاں طوفانی بارش کے ساتھ شدید ژالہ باری ہوئی۔ طوفان کی شدت کے باعث متعدد درخت جڑوں سے اکھڑ گئے اور بجلی کے کھمبے گرنے سے وسیع پیمانے پر بجلی کی فراہمی منقطع ہو گئی ہے۔
پشاور، مالاکنڈ اور بنوں سمیت کے پی کے کے مختلف اضلاع میں بادل خوب گرجے اور موسلادھار بارش ہوئی۔ کئی نشیبی علاقوں میں پانی جمع ہونے سے شہریوں کو آمد و رفت میں دشواری کا سامنا کرنا پڑا۔ میانوالی میں انفراسٹرکچر کو پہنچنے والے نقصان کے بعد امدادی ٹیمیں سڑکوں سے درختوں اور کھمبوں کو ہٹانے کے کام میں مصروف ہیں۔ محکمہ موسمیات نے خبردار کیا ہے کہ بارش کا یہ سلسلہ وقفے وقفے سے جاری رہ سکتا ہے۔
