– Advertisement –
لاہور۔15ستمبر (اے پی پی):انڈونیشیا کے سفیر چندرا ڈبلیو سکوٹجو نے لاہور چیمبر آف کامرس اینڈ انڈسٹری میں خطاب کرتے ہوئے کہا ہے کہ ان کا مشن پاکستان اور انڈونیشیا کے درمیان تجارتی و معاشی تعاون کو مزید مستحکم کرنا ہے۔ اس موقع پر صدر لاہور چیمبر میاں ابوذر شاد، سینئر نائب صدر انجینئر خالد عثمان اور ایگزیکٹو کمیٹی ممبران بھی موجود تھے۔
انڈونیشین سفیر نے کہا کہ پاکستان اور انڈونیشیا نہ صرف تجارتی شراکت دار ہیں بلکہ تاریخی، ثقافتی اور مذہبی رشتوں میں بھی جڑے ہوئے ہیں۔ ان کا کہنا تھا کہ بزنس ٹو بزنس روابط اور کاروباری برادری کو سہولیات فراہم کرنا معاشی اہداف کے حصول میں مددگار ثابت ہوگا۔
– Advertisement –
انہوں نے کہا کہ معدنیات، توانائی، صنعت، زراعت، فارماسیوٹیکل، پروسیسڈ فوڈ، قابل تجدید توانائی اور ہیلتھ کیئر کے شعبوں میں تعاون کی وسیع گنجائش موجود ہے۔انہوں نے مزید کہا کہ پاکستان بہترین اسٹریٹجک جغرافیائی حیثیت رکھتا ہے جبکہ انڈونیشیا سرمایہ کاری کے وسیع مواقع فراہم کرتا ہے، جن سے پاکستانی تاجر مشترکہ منصوبوں اور پارٹنرشپ کے ذریعے فائدہ اٹھا سکتے ہیں۔صدر لاہور چیمبر میاں ابوذر شاد نے کہا کہ پاکستان اور انڈونیشیا دنیا کی بڑی مسلم آبادی رکھنے والی ریاستیں اور او آئی سی کے اہم رکن ہیں۔
انڈونیشیا آسیان کی سب سے بڑی معیشت ہے جس کا جی ڈی پی 1.4 کھرب ڈالر سے زائد ہے اور یہ عالمی تجارت میں اہم کردار ادا کر رہا ہے۔
انہوں نے کہا کہ پاکستان انڈونیشیا سے پام آئل، کوئلہ، مصنوعی فائبر اور کاغذ درآمد کرتا ہے جبکہ برآمدات میں چاول، تمباکو، کپاس کی مصنوعات، لیموں، لیدر، مچھلی اور مکئی شامل ہیں تاہم پاکستان ویلیو ایڈڈ ٹیکسٹائل، فارماسیوٹیکل، پروسیسڈ فوڈ، لائٹ انجینئرنگ، سرجیکل انسٹرومنٹس اور اسپورٹس گڈز میں اپنی برآمدات بڑھانے کی بھرپور صلاحیت رکھتا ہے۔
سینئر نائب صدر انجینئر خالد عثمان نے زور دیا کہ دونوں ممالک کے سفارتی مشنز کے کمرشل سیکشنز کو زیادہ فعال ہونا چاہیے اور تجارتی میلوں، نمائشوں اور بزنس وفود کے تبادلوں کے ذریعے بی ٹو بی تعلقات کو مزید فروغ دینا چاہیے۔ انہوں نے دفاع، تعلیم، زراعت اور سیاحت میں مشترکہ منصوبوں کے ذریعے تعاون بڑھانے کی تجویز بھی دی۔
– Advertisement –
