تائے وے: تائیوان کی چانگہوا کاؤنٹی کے ایرشوئی جونیئر ہائی سکول نے گریجویشن کے لیے ایک دلچسپ اور منفرد شرط رکھی ہے: طلبہ کو گریجویشن مکمل کرنے سے پہلے اسکول کی بلند ترین کلائمبنگ وال پر چڑھنے کی مہارت حاصل کرنی ہوگی۔
یہ سکول تائیوان کی بلند ترین کلائمبنگ وال کا حامل ہے، اور اس نے طلبہ کی عملی تربیت میں کوہ پیمائی کو باقاعدہ شامل کیا ہے۔ ہر طالب علم کو ہفتے میں چھ اسباق میں کلائمبنگ کی تربیت دی جاتی ہے، اور انہیں یہ دیوار چڑھنے کی صلاحیت اپنی تعلیم مکمل کرنے سے قبل ثابت کرنی ہوتی ہے۔
اس منفرد شرط کا مقصد طلبہ میں جسمانی ہم آہنگی، توازن، خود اعتمادی اور توجہ کو بڑھانا ہے۔ یہ دیوار تقریباً پانچ منزلہ عمارت کے برابر بلند ہے، جو عام طور پر خوف کا باعث بن سکتی ہے، مگر یہاں کے طلبہ اسے ایک چیلنج اور دلچسپ کھیل کے طور پر لیتے ہیں۔
دلچسپ بات یہ ہے کہ کئی طلبہ اپنے فارغ اوقات میں اپنے والدین کے ساتھ بھی کلائمبنگ کی مشق کرتے ہیں، جس سے نہ صرف ان کی مہارت میں اضافہ ہوتا ہے، بلکہ خاندانی روابط بھی مضبوط ہوتے ہیں۔
یہ قدم تائیوان میں کوہ پیمائی کے شوق کو بڑھانے میں مددگار ثابت ہو رہا ہے، خاص طور پر جب سے معروف کوہ پیما الیکس ہونولڈ نے تائی پے 101 ٹاور پر چڑھ کر اسے عالمی سطح پر مقبولیت دلائی ہے۔
