لاہور : وزیر اطلاعات پنجاب عظمیٰ بخاری نے کہا ہے کہ پنجاب حکومت نے حالیہ سیلاب کے دوران ملکی تاریخ کا سب سے بڑا ریسکیو آپریشن انجام دیا ہے، اور سیلاب زدگان کی بحالی حکومت کے لیے ایک بڑا چیلنج بن چکی ہے۔ ان کا کہنا تھا کہ وزیراعلیٰ پنجاب مریم نواز جلد ریلیف پیکج کا اعلان کریں گی۔
اپنے بیان میں عظمیٰ بخاری نے کہا کہ پنجاب کو ملکی تاریخ کے سب سے شدید سیلاب کا سامنا کرنا پڑا، مگر بروقت حکومتی اقدامات کے باعث لاکھوں جانیں بچائی جا سکیں۔ انہوں نے کہا کہ مریم نواز اور ان کی ٹیم متاثرینِ سیلاب کی خدمت میں دن رات مصروف عمل ہے۔
انہوں نے مزید کہا کہ پنجاب حکومت نے تمام تر وسائل کو بروئے کار لاتے ہوئے سب سے بڑا ریسکیو آپریشن مکمل کیا، اور اب سیلاب سے متاثرہ افراد کی آبادکاری کا عمل ایک بڑا امتحان ہے۔ نقصانات کے تخمینے کے لیے سروے جاری ہے، اور اس کی تکمیل کے بعد مریم نواز ریلیف پیکج کا باقاعدہ اعلان کریں گی۔
عظمیٰ بخاری نے بعض سیاسی مخالفین پر تنقید کرتے ہوئے کہا کہ پنجاب حکومت پر انگلیاں وہ لوگ اٹھا رہے ہیں جن کے اپنے صوبے — خصوصاً خیبرپختونخوا — میں سیلاب اور بارشوں سے سیکڑوں افراد جاں بحق ہوئے، اور وہاں کے متاثرین آج بھی بے یار و مددگار ہیں۔ ان کا کہنا تھا کہ کے پی حکومت نہ عوامی مسائل حل کر رہی ہے، نہ ہی وہاں اپنی حکومتی رٹ قائم کر پا رہی ہے۔
