– Advertisement –
اسلام آباد۔10ستمبر (اے پی پی):وزیراعظم محمد شہباز شریف نے سندھ بالخصوص کراچی میں سیلابی صورتحال کا نوٹس لیتے ہوئے کہا ہے کہ وفاق اور سندھ حکومت صورتحال سے نمٹنے کیلئے کوشاں ہیں، این ڈی ایم اے امدادی کارروائیوں کے لئے صوبائی حکومت اور سندھ ڈیزاسٹر مینجمنٹ اتھارٹی سے مکمل تعاون کرے، کراچی میں سیلاب سےمتاثرہ خاندانوں کی امداد اور بحالی کیلئے ترجیحی اقدامات کئے جائیں، سیلاب میں لاپتہ ہونے والے افراد کو جلد از جلد تلاش کیا جائے، متاثرہ مواصلاتی نظام کی بحالی کو یقینی بنایا جائے۔
بدھ کو وزیراعظم آفس کے میڈیا ونگ سے جاری بیان کے مطابق وزیراعظم نے کراچی میں متحرک امدادی کارروائیوں پر ریسکیو 1122، پاک فوج اور رینجرز کو سراہا اور گڈاب ندی میں شہریوں کے ڈوبنے پر افسوس کا اظہار کیا۔ وزیراعظم نے ہدایت کی کہ این ڈی ایم اے کراچی اور سندھ کے دیگر علاقوں میں سیلاب کے پیش نظر امدادی کارروائیوں کے لئے صوبائی حکومت اور سندھ ڈیزاسٹر مینجمنٹ اتھارٹی سے مکمل تعاون کرے، متعلقہ ادارے سیلاب میں لا پتہ افراد کو جلد از جلد تلاش کریں، عوام کو سیلابی صورتحال سے آگاہ کرنے کے لئے آگاہی مہم کو مزید متحرک کیا جائے تاکہ زیادہ سے زیادہ شہری سیلاب سے بچ سکیں۔
– Advertisement –
وزیراعظم نے ہدایت کی کہ سیلاب سے متاثرہ نظام مواصلات کی جلد از جلد بحالی اور کراچی میں سیلاب سے متاثرہ خاندانوں کی امداد اور بحالی کے لئے ترجیحی بنیادوں پر اقدامات کئے جائیں۔ انہوں نے کہا کہ سیلابی صورتحال سے نمٹنے کے لئے وفاق اور سندھ حکومت مکمل طور پر متحرک ہیں۔
– Advertisement –
