– Advertisement –
لاہور۔11ستمبر (اے پی پی):وفاقی وزیر مواصلات عبدالعلیم خان نے جمعرات کو پاکستان ریلویز ہیڈکوارٹرز لاہور کا دورہ کیا اور وزیر ریلوے محمد حنیف عباسی سے ملاقات کی۔ دونوں وزرا نے ریلوے میں جاری اصلاحات اور مستقبل کے منصوبوں پر تفصیلی بات چیت کی۔وفاقی وزیر مواصلات نے وزیر ریلوے کے ہمراہ اجلاس کی صدارت بھی کی، جس میں ریلوے کے مختلف شعبوں میں ہونے والی پیش رفت کا جائزہ لیا گیا۔
وزیر ریلوے نے اس موقع پر ریلوے میں جاری ریفارمز پر تفصیلی بریفنگ دیتے ہوئے کہا کہ ریلوے انفراسٹرکچر میں بہتری کے لیے صوبائی حکومتوں کے ساتھ شراکت داری کی جا رہی ہے۔ انہوں نے کہا کہ ریلوے آٹومیشن پر جا رہا ہے اور اس مشن میں کامیابی کے لیے ہر ممکن کوششیں کی جائیں گی۔محمد حنیف عباسی نے کہا کہ ریلوے کے ملازمین انتہائی محنتی ہیں اور حالیہ بدترین سیلاب کے باوجود مین لائن ون کو ایک دن کے لیے بھی بند نہیں ہونے دیا گیا۔
– Advertisement –
انہوں نے بتایا کہ کراچی میں دو نئے سی آئی پی لانجز تعمیر کیے جا رہے ہیں جن کا افتتاح اکتوبر میں کیا جائے گا۔ عبدالعلیم خان نے ریلوے ریفارمز کے حوالے سے وزیر ریلوے کی کوششوں کو سراہتے ہوئے کہا کہ ریلوے اسٹیشنوں پر فوڈ پوائنٹس کی فوڈ اتھارٹی کے ذریعے انسپکشن قابلِ تقلید اقدام ہے۔
انہوں نے ریفارمز کے سلسلے میں تجاویز بھی پیش کیں جن کا وزیر ریلوے نے خیرمقدم کیا۔ بعدازاں وفاقی وزیر مواصلات نے وزیر ریلوے کے ہمراہ لاہور ریلوے اسٹیشن کا دورہ کیا اور مسافروں کے لیے فراہم کی گئی سہولیات کا جائزہ لیا۔ انہوں نے ریلوے انتظامیہ کے اقدامات کو سراہا۔
– Advertisement –
