– Advertisement –
اسلام آباد۔14ستمبر (اے پی پی):محکمہ موسمیات پاکستان نے خبردار کیا ہے کہ مغربی ہواؤں اور بحیرہ عرب سے آنے والی مرطوب ہواؤں کے باعث ملک کے بالائی علاقوں میں 15 ستمبر کی شام سے 19 ستمبر تک تیز ہوائوں اور گرج چمک کے ساتھ بارش کا امکان ہے جو وقفے وقفے سے جاری رہے گا۔خیبر پختونخوا میں16 سے 19 ستمبر تک دیر، چترال، سوات، کوہستان، شانگلہ، بٹگرام، مانسہرہ، ایبٹ آباد، ہری پور، بونیر، ملاکنڈ،باجوڑ، مہمند، کوہاٹ، پشاور، چارسدہ، نوشہرہ، مردان، صوابی،خیبر، اورکزئی، کرم، ہنگو، کرک، وزیرستان میں طوفان اور گرج چمک کے ساتھ بارش متوقع ہے۔
پنجاب، کشمیر اور گلگت بلتستان کے بعض علاقوں میں بھی بارش کا امکان ہے احتیاطی تدابیر کے پیش نظر متاثرہ علاقوں کے رہائشی اور مسافر حضرات محکمہ موسمیات کی تازہ ترین اطلاعات سے باخبر رہیں، شدید بارش کے دوران غیر ضروری سفر سے گریز کریں اور شہری سیلاب یا پہاڑی علاقوں میں لینڈ سلائیڈنگ کے خطرے کے پیش نظر حفاظتی اقدامات کریں۔
– Advertisement –
کشمیر میں بارش اور گرج چمک کے ساتھ چھڑکیں متوقع ہیں جن علاقوں میں بارش کا امکان ہے ان میں نیلم ویلی، مظفرآباد، راولا کوٹ، پونچھ، ہٹیاں، باغ، حویلی، سدھنوتی، کوٹلی، بھمبر اور میرپور شامل ہیں۔ یہ سلسلہ 15 ستمبر کی رات سے 19 ستمبر تک جاری رہ سکتا ہے، جبکہ 16 اور 18 ستمبر کو بعض مقامات پر موسلا دھار بارش کا امکان ہے۔گلگت بلتستان میں بھی دیامر، استور، غذر، سکردو، ہنزہ، گلگت، گانچھے اور شگر میں 16 ستمبر سے 19 ستمبر کے دوران بارش اور گرج چمک کے ساتھ ہوائیں چلنے کا امکان ہے۔
پنجاب اور اسلام آباد میں اسلام آباد، راولپنڈی، مری، گلیات، اٹک، چکوال اور جہلم میں 16 سے 19 ستمبر کے دوران گرج چمک کے ساتھ بارش اورہوائیں متوقع ہیں۔جبکہ 18 اور 19 ستمبر کو منڈی بہاؤالدین، گجرات، گوجرانوالہ، حافظ آباد، وزیرآباد، لاہور، قصور، شیخوپورہ، سیالکوٹ، نارووال، میانوالی، خوشاب، سرگودھا، ساہیوال، جھنگ، ٹوبہ ٹیک سنگھ اور فیصل آباد میں بارش کا امکان ہے۔
بعض علاقوں میں موسلا دھار بارش بھی متوقع ہے۔ادھر سندھ اور بلوچستان کے زیادہ تر علاقوں میں موسم خشک رہے گا، جبکہ ساحلی علاقوں میں جزوی طور پر ابر آلود موسم متوقع ہے۔محکمہ موسمیات نے خبردار کیا ہے کہ آندھی، ژالہ باری اور آسمانی بجلی گرنے کے باعث کمزور ڈھانچوں جیسے کہ کچے مکانات، بجلی کے کھمبے، بل بورڈز، گاڑیاں اور سولر پینلز کو نقصان پہنچ سکتا ہے۔
موسم کی پیشگوئی کے مطابق خیبر پختونخوا، گلگت بلتستان، مری، گلیات اور کشمیر کے پہاڑی علاقوں میں لینڈ سلائیڈنگ (زمین کھسکنے) کا بھی خدشہ ہے، جبکہ 18 اور 19 ستمبر کو شدید بارشوں کے باعث دیر، سوات، شانگلہ، بونیر، کوہستان، مانسہرہ، ایبٹ آباد، چارسدہ، نوشہرہ، صوابی، مردان، مری، گلیات، اسلام آباد، راولپنڈی اور کشمیر کے مقامی نالوں اور دریاؤں میں پانی کا بہاؤ بڑھ سکتا ہے۔
عوام، مسافروں اور سیاحوں کو احتیاط برتنے اور کمزور یا خطرناک علاقوں میں جانے سے گریز کرنے کی ہدایت کی گئی ہے، جبکہ تمام متعلقہ اداروں کو چوکس رہنے اور کسی بھی ناخوشگوار صورتحال سے بچنے کے لیے پیشگی اقدامات کرنے کی ہدایت جاری کی گئی ہے۔
– Advertisement –
