– Advertisement –
اسلام آباد۔18ستمبر (اے پی پی):قائم مقام چیئرمین سینیٹ سیدال خان نے پاک۔سعودی معاہدے کا خیر مقدم کرتے ہوئے کہا ہے کہ پاک سعودی معاہدہ خطے کے امن، سلامتی اور ترقی کا سنگِ میل ہے،پاک۔سعودی معاہدہ امت مسلمہ کے اتحاد اور اجتماعی قوت کا مظہر ہے۔
جمعرات کو سینیٹ سیکرٹریٹ سے جاری بیان کے مطابق انہوں نے کہا کہ وزیراعظم شہباز شریف کا دورہ سعودی عرب انتہائی اہمیت کا حامل رہا ہے۔
– Advertisement –
انہوں نے کہا کہ سعودی عرب کے ساتھ معاہدے پاکستان اور خطے کی خوشحالی اور استحکام کی ضمانت ہیں، یہ معاہدہ دفاعی تعاون کے ساتھ اقتصادی شراکت داری ،،اور ٹیکنالوجی کی منتقلی کے نئے مواقع پیدا کرے گا ،پاک۔سعودی معاہدہ امت مسلمہ کے اتحاد اور اجتماعی قوت کا مظہر ہے۔
قائم مقام چیئرمین سینیٹ نے کہا کہ پاکستان سعودی عرب کے ساتھ تعلقات کو باہمی اعتماد، اخوت اور دین اسلام کے مقدس رشتے پر استوار سمجھتا ہے ، سعودی عرب کی سرزمین مکہ و مدینہ سے ہر پاکستانی کے دل کی گہری وابستگی ہے۔
انہوں نے کہا کہ پاکستان اور سعودی عرب ہمیشہ ایک دوسرے کے ساتھ کھڑے رہے ہیں۔
سیدال خان نے کہا کہ وزیراعظم شہباز شریف کو ملنے والا شاندار پروٹوکول دونوں ممالک کے گہرے تعلقات کا عکاس ہے، پاک۔سعودی معاہدے پاکستان میں ترقی، خوشحالی اور معاشی استحکام کا پیش خیمہ ثابت ہوں گے ۔
– Advertisement –
