ممبئی : تامل فلم انڈسٹری کی مشہور اداکارہ اور فیشن ڈیزائنر شالنی نے طلاق کا اعلان ایک منفرد اور جرات مندانہ انداز میں کیا ہے۔ انہوں نے لال رنگ کا جوڑا زیب تن کرتے ہوئے اپنا طلاق فوٹو شوٹ سوشل میڈیا پر شیئر کیا، جو تیزی سے وائرل ہو رہا ہے۔
شالنی نے اس لمحے کو ایک نئے آغاز کے طور پر مناتے ہوئے اپنی شادی کی تصویر بھی پھاڑ دی اور طلاق کو ایک جشن کی طرح منانے کی اپیل کی۔ اس منفرد اقدام پر جہاں انہیں سخت تنقید کا سامنا ہے، وہیں بہت سے لوگ ان کے حوصلے اور سوچ کو سراہ بھی رہے ہیں۔
اپنی پوسٹ میں شالنی نے ان خواتین کے لیے پیغام دیا جو شادی شدہ زندگی میں مشکلات کا سامنا کر رہی ہیں لیکن آواز بلند کرنے سے گھبراتی ہیں۔ ان کا کہنا تھا کہ “اگر شادی خوشگوار نہ ہو تو اسے ختم کرنا ہی بہتر فیصلہ ہے۔اداکارہ نے مزید کہا کہ طلاق کو ناکامی نہیں بلکہ زندگی کا ایک نیا اور مثبت موڑ سمجھنا چاہیے۔
شالنی نے 2020 میں ریاض نامی شخص سے شادی کی تھی، جن سے ان کی ایک بیٹی بھی ہے۔ انہوں نے شوہر پر ذہنی اور جسمانی تشدد کے الزامات عائد کیے تھے جس کے بعد انہوں نے علیحدگی اختیار کر لی۔
