– Advertisement –
اسلام آباد۔10ستمبر (اے پی پی):سپیکر قومی اسمبلی سردار ایاز صادق نے اسرائیل کے قطر پر حملوں کی شدید الفاظ میں مذمت کرتے ہوئے کہا ہے کہ اسرائیلی حملے بین الاقوامی قوانین اور اقوام متحدہ کے چارٹر کی کھلی خلاف ورزی ہیں،اسرائیلی جارحیت ریاستی خودمختاری کے تقدس پر کھلا حملہ ہے۔قطر کی شوریٰ کونسل کے سپیکر حسن بن عبداللہ الغانم کے نام خط میں سپیکر سردار ایاز صادق نے کہا کہ عالمی امن کے لیے سرحدوں کا احترام بنیادی شرط ہے،اسرائیلی جارحیت خطرناک اشتعال انگیزی ہے،عالمی برادری اسرائیلی اقدامات کی فوری اور دوٹوک مذمت کرے۔
سپیکر سردار ایاز صادق نے پارلیمان اور عوام کی جانب سے قطر کی قیادت اور عوام سے مکمل یکجہتی کا اظہار کرتے ہوئے کہا کہ قطر خطے میں امن اور سفارتکاری کیلئے مرکزی کردار ادا کر رہا ہے،قطر پر حملہ پوری امت مسلمہ پر حملے کے مترادف ہے،عالمی برادری قطر پر جارحیت کے ذمہ داروں کو انصاف کے کٹہرے میں لائے۔سپیکر سردار ایاز صادق نے کہا کہ عالمی برادری اسرائیلی جارحانہ اقدامات کی روک تھام کے لیے موثر اقدامات اٹھائے،قوانین پر مبنی عالمی نظام امن کا تحفظ ناگزیر ہے۔
– Advertisement –
سپیکر سردار ایاز صادق نے قطر کی عوام اور شوریٰ کونسل سے مکمل حمایت اور یکجہتی کا اعادہ کرتے ہوئے کہا کہ آزمائش کی اس گھڑی میں پاکستان کی پارلیمان اور عوام اپنے قطری بہن بھائیوں کے شانہ بشانہ کھڑے ہیں۔ سپیکر سردار ایاز صادق نے اعتماد کا اظہار کیا کہ قطر روایتی استقامت اور وقار سے اس آزمائش پر قابو پائے گا۔
– Advertisement –
