– Advertisement –
اسلام آباد۔17ستمبر (اے پی پی):سپیکر قومی اسمبلی سردار ایاز صادق سے آزاد جموں و کشمیر قانون ساز اسمبلی کے سپیکر چوہدری لطیف اکبر نے وفد کے ہمراہ ملاقات کی ۔ وفد میں ممبران قانون ساز اسمبلی آزاد کشمیر سابق وزیراعظم آزاد کشمیر راجہ فاروق حیدر خان، حافظ احمد رضا قادری، حامد رضا اور دیوان علی چغتائی شامل تھے ۔ بدھ کو پارلیمنٹ ہائوس میں ہونے والی ملاقات میں بھارتی آبی جارحیت اور مقبوضہ جموں کشمیر میں انسانی حقوق کی سنگین خلاف ورزیوں کی مذمت کی گئی۔
سپیکر سردار ایاز صادق نے وفد کے ساتھ گفتگو کرتے ہوئے کہا کہ ایوان میں موجود تمام اراکین میرے لئے یکساں ہیں،15 ویں قومی اسمبلی کے پہلے ساڑھے تین سالوں میں کسی رکن کے پروڈکشن آرڈر جاری نہیں ہوئے، بطور کسٹوڈین آف دی ہاؤس تمام اراکین کے پروڈکشن آرڈرز یقینی بنائے ، اراکین پارلیمنٹ کے مسائل بلاامتیاز حل کرنا میری ترجیح ہے، پارلیمان نے ہمیشہ مسئلہ کشمیر کو تمام علاقائی اور عالمی فورمز پر بھرپور طریقے سے اجاگر کئے ہیں۔
– Advertisement –
انہوں نے آزاد کشمیر میں حالیہ طوفانی بارشوں سے ہونے والے جانی و مالی نقصان پر گہرے دکھ اور افسوس کا اظہار کیا اور کہا کہ پاکستان اور آزاد کشمیر کی عوام کے دل ایک ساتھ دھڑکتے ہیں۔سپیکر قومی اسمبلی سردار ایاز صادق نے مسئلہ کشمیر کو تمام علاقائی اور عالمی فورمز پر بھرپور انداز میں اجاگر کرنے کے عزم اعادہ کیا اور 5 اگست 2019 کے بھارتی حکومت کے یکطرفہ اقدام کی مذمت کی ۔ انہوں نے کہا کہ بھارت طاقت کے بل بوتے پر کشمیری عوام کے جذبہ حریت کو دبا نہیں سکتا۔
سپیکر آزاد کشمیر اسمبلی چوہدری لطیف اکبر نے کہا کہ آزاد کشمیر میں گلیشیئرز پگھلنے سے فلیش فلڈنگ کا شدید خطرہ ہے، موسمیاتی تبدیلیوں کی وجہ سے گلگت بلتستان اور کشمیر سب سے زیادہ متاثر ہو رہے ہیں۔سپیکر چوہدری لطیف اکبر نے پنجاب میں سیلاب متاثرہ علاقوں کے عوام سے یکجہتی کا اظہار کیا اور کہا کہ مشکل گھڑی میں پنجاب کی عوام کو درپیش تکلیف کو محسوس کر سکتے ہیں۔
چوہدری لطیف اکبر نے سپیکر قومی اسمبلی سردار ایاز صادق کی پارلیمانی سفارتکاری کاری کے فروغ کیلئے کاوشوں کو سراہا اورکہا کہ آزاد کشمیر میں سیاحت کے فروغ کے وسیع مواقع موجود ہیں، معرکہ حق میں اللہ تعالیٰ نے پاکستان کو عظیم فتح سے ہم کنار فرمایا ہے، 10 مئی کی کامیابی پاکستان کی عسکری و سفارتی فتح ہے۔
چوہدری لطیف اکبر نے ملک کے قانون ساز اداروں کے مابین تعاون کو فروغ دینے کے سپیکر قومی اسمبلی کے کردار کو کو سراہا اور کہا کہ مسئلہ کشمیر کو عالمی سطح پر اجاگر کرنے کیلئے پاکستان اور آزاد کشمیر کے اراکین قانون ساز اسمبلی کو ملکر جدو جہد کرنا ہوں گی۔
آزاد کشمیر قانون ساز اسمبلی کے اراکین نے اقوام عالم میں مسئلہ کشمیر کو بھرپور انداز میں اجاگر کیا ہے، مسئلہ کشمیر کو حل کئے بغیر خطے میں پائیدار امن قائم نہیں ہو سکتا، کشمیر کے مسئلے کو عالمی سطح پر اجاگر کرنے کے لئے کوششوں کو مزید تیز کرنے کی ضرورت ہے، مسئلہ کشمیر پر پاکستانی حکومت اور عوام کی غیر متزلزل حمایت قابل ستائش ہے۔
– Advertisement –
