– Advertisement –
راولپنڈی۔12ستمبر (اے پی پی):روٹس سکول سسٹم نے اسکول کی سطح پر کرکٹ کے فروغ کے لیے ایک جامع منصوبے کا آغاز کر دیا ہے جس کے تحت تربیتی کیمپس اور بڑے ٹورنامنٹس منعقد کیے جائیں گے۔ اس منصوبے کا مقصد طلبہ و طالبات کو کھیلوں میں بھرپور شرکت کے مواقع فراہم کرنا اور کرکٹ کے میدان میں نئے ٹیلنٹ کو سامنے لانا ہے۔ ہیڈ کوچ روٹس سکول سسٹم ظہور بھٹی نے اے پی پی سے گفتگو میں بتایا کہ ادارہ گراس روٹ لیول پر کھلاڑیوں کو سامنے لانے کے لیے عملی اقدامات کر رہا ہے۔
اس سلسلے میں تمام کلاسز کے بچوں اور بچیوں کے ٹرائلز مکمل ہو چکے ہیں جن میں کئی باصلاحیت کھلاڑی سامنے آئے ہیں۔ انہوں نے کہا اب تربیتی کیمپس کا آغاز کیا جا رہا ہے جہاں نوجوان کھلاڑیوں کو عالمی معیار کی کوچنگ فراہم کی جائے گی۔ ظہور بھٹی نے کہا کہ کیمپ کے دوران کھلاڑیوں کی بیٹنگ، باؤلنگ اور فیلڈنگ کے ساتھ ساتھ فٹنس پر بھی خصوصی توجہ دی جائے گی تاکہ یہ نوجوان مستقبل میں قومی اور بین الاقوامی سطح پر ملک کی نمائندگی کے قابل ہو سکیں۔ انہوں نے مزید بتایا کہ روزانہ پریکٹس سیشنز کے ذریعے کھلاڑیوں کی مہارتوں میں بہتری لائی جائے گی۔
– Advertisement –
ہیڈ کوچ نے اس موقع پر پرنسپل رفعت مشتاق کی کاوشوں کو خراج تحسین پیش کرتے ہوئے کہا کہ وہ ذاتی دلچسپی اور کوششوں سے اسکول کرکٹ کے فروغ میں کلیدی کردار ادا کر رہی ہیں۔ ان کے مطابق روٹس اسکول سسٹم کے تمام کیمپس کھیلوں کے میدان اور دیگر سہولیات سے آراستہ ہیں جس سے طلبہ کو کھیل کے بہترین مواقع میسر ہیں۔
انہوں نے بتایا کہ تربیتی کیمپس کے اختتام پر حتمی ٹیموں کا انتخاب کیا جائے گا اور بعد ازاں لڑکوں اور لڑکیوں کے لیے علیحدہ علیحدہ ٹورنامنٹس منعقد ہوں گے۔ ان مقابلوں سے نوجوان کھلاڑیوں کو اپنی صلاحیتیں منوانے کا سنہری موقع ملے گا اور اسکولوں کے درمیان صحت مند مقابلے کی فضا بھی قائم ہو گی۔
– Advertisement –
