– Advertisement –
اسلام آباد۔13ستمبر (اے پی پی):سوئٹرز لینڈ کے شہر ڈیووس میں منعقد ہونے والی دنیا کی پہلی گلوبل ایس ایم ایز سمٹ میں کامیابیاں سمیٹنے کے بعد پاکستانی وفد وطن واپس پہنچ گیا ،گلوبل سمٹ میں ایس ایم ایز کی ترقی میں نمایاں کردار ادا کرنے والے نامور ماہرین ،مختلف خطوں سے حکومتی شخصیات ،کاروباری رہنمائوں، پالیسی سازوں ،سرمایہ کاروں اور سفارتکاروں نے شرکت کی۔سمٹ میں عالمی سطح پر ایس ایم ایز کے کردار کو اجاگر کرنے ،درپیش چیلنجز ،ترقی پذیر ممالک میں جدید ٹیکنالوجی کی عدم دستیابی ،بڑے ممالک کی ٹیکنالوجی سے استفادہ کرنے اور ایس ایم ایز کی ترقی کے لئے سرمایہ کاری کے حصول کے حوالے سے تفصیلی تبادلہ خیال کیا گیا ۔پاکستان کی نمائندگی کرنے والے پاکستان انڈسٹریل سیونگ مشینز امپورٹرز اینڈ ڈیلرز ایسوسی ایشن (پسمیڈا)کے وائس چیئرمین محمد یاسین نے وطن واپسی پر بتایا کہ ایس ایم ایز سمٹ میں شریک مندوبین نے زور دے کر کہا کہ چھوٹی اور درمیانی درجے کی صنعتیں نہ صرف معاشی ترقی کا بنیادی ستون ہیں بلکہ روزگار کے مواقع پیدا کرنے میں بھی کلیدی کردار ادا کرتی ہیں۔سمٹ میں ایس ایم ایز میں جدت اور ترقی کے روایتی طریقوں کی بجائے ڈیجیٹلائزیشن ، فنانسنگ تک رسائی اور عالمی مارکیٹوں میں ایس ایم ایز کے حجم کو بڑھانے پر زور دیا گیا ۔
مندوبین نے کہا کہ پالیسی سازوں کو چھوٹے کاروباروں کوسازگار ماحول فراہم کرنا چاہیے تاکہ وہ بدلتی ہوئی عالمی معیشت میں موثر کردار ادا کر سکیں۔محمد یاسین نے کہا کہ ایس ایم ایز سمٹ میں پاکستان کے نجی شعبے کی شرکت انتہائی کامیاب رہی ۔ سمٹ میں مختلف ممالک کے وزرا ، پالیسی سازوں ، سفارتکاروں اور سرمایہ کاروں سے تفصیلی ملاقاتیں ہوئیں ،جنہیں مستقبل میں مضبوط روابط کے فروغ کے لئے استعمال کیا جائے گا۔ ہم پاکستان میں ایس ایم ایز سے وابستہ تنظیموں اور ایسوسی ایشنز کو آن بورڈ لے کر ان رابطوں کو پاکستان میں ایس ایم ایز کی ترقی کے لئے بروئے کار لانے کے لئے پر عزم ہیں۔ انہوں نے بتایا کہ پاکستانی وفد نے سمٹ کے انعقاد کےلئے مختص کانگریس ہال کے سٹیج پر نہ صرف اپنے ملک کا پرچم لہرایا بلکہ پاکستان زندہ باد کے نعرے بھی لگائے ۔انہوں نے کہا کہ ہم گلوبل ایس ایم ایزبزنس ہوم کے صدر انیس خان اورپاکستان کی کنٹری ہیڈ آمنہ احمد رضا کے شکر گزار ہیں جنہوں نے پاکستان کو اس غیر معمولی ایونٹ میں شرکت کی دعوت دی جس کا یقینی طور پر پاکستان کو بہت زیادہ فائدہ ہوگا۔ انہوں نے بتایا کہ ایس ایم ایز سمٹ میں یورپی اور خلیجی ممالک کے وینچر کیپیٹلسٹ سے بھی ملاقاتیں ہوئیں جس میں انہیں پاکستان میں مختلف منصوبوں کےلئے فنڈنگ کرنے کے حوالے سے ترغیب دی گئی ہے ۔
– Advertisement –
