– Advertisement –
اسلام آباد۔15ستمبر (اے پی پی):وفاقی وزیر برائے قومی صحت سید مصطفیٰ کمال نے کہا ہے کہ حکومت سروائیکل کینسر سے بچائو کے لیے بھرپور اقدامات کو یقینی بنا رہی ہے، 9 سے 14 سال کی بچیوں کے لیے ویکسینیشن مہم اسی سلسلے کی ایک اہم کڑی ہے۔جاری اپنے بیان میں انہوں نے کہا کہ 12 روزہ انسداد سروائیکل کینسر ویکسینیشن مہم 15 ستمبر سے 27 ستمبر تک جاری رہے گی اور اس کا دائرہ کار پنجاب، سندھ، اسلام آباد اور آزاد کشمیر تک وسیع کیا گیا ہے۔انہوں نے کہا کہ بچیوں اور بہنوں کو اس مرض سے بچانے کے لیے ویکسین لازمی کی جائے ۔
مصطفیٰ کمال نے کہا بدقسمتی سے سروائیکل کینسر ویکسین کے حوالہ سے جھوٹا پراپیگنڈا کیا جا رہا ہے جس کا حقیقت سے کوئی تعلق نہیں، والدین کسی منفی یا بے بنیاد مہم کا شکار نہ ہوں اور 9 سے 14 سال کی بچیوں کو ضرور ویکسین لگوائیں۔انہوں نے مزید کہا کہ ہمیں اپنی بیٹیوں کے محفوظ مستقبل کے لیے اپنی ذمہ داری نبھانی ہوگی، تمام مائوں سے گزارش ہے کہ وہ اپنی بیٹیوں کی صحت اور زندگی کو فوقیت دیں، ہمارا کام آگاہی دینا ہے ،انہوں نے مزید کہا کہ پاکستان میں ہر سال تقریباً 5 ہزار خواتین سروائیکل کینسر میں مبتلا ہوتی ہیں جن میں سے 3 ہزار سے زائد اپنی جان کی بازی ہار جاتی ہیں یہ ایک سنجیدہ مسئلہ ہے جس کا حل صرف بروقت ویکسینیشن میں ہے۔
– Advertisement –
انہوں نے کہا کہ عوام 1166 پر کال کرکے ویکسینیشن ٹیم گھر طلب کر سکتے ہیں۔ وفاقی وزیر صحت نے کہا کہ پاکستان دنیا کا وہ واحد ملک ہے جہاں پولیو تاحال ختم نہیں ہوا، سالانہ 64 ہزار والدین اپنے بچوں کو پولیو ویکسین پلانے سے انکار کر دیتے ہیں جو ایک خطرناک رجحان ہے، ہر سال تقریباً 11 ہزار خواتین زچگی کے دوران جان کی بازی ہار جاتی ہیں ، ملک میں بیماریاں بڑھ رہی ہیں اور صرف ہسپتال بنانے سے مسائل کا حل ممکن نہیں ۔
پاکستان میں 68 فیصد بیماریوں کی بنیادی وجہ آلودہ پانی ہے، ہمیں سیوریج کے ٹریٹمنٹ کے نظام کی بہتری کیلئے ٹھوس منصوبہ بندی کرنا ہو گی، ڈینگی کی روک تھام کے لیے بھی حکومت بھرپور اقدامات کر رہی ہے تاہم عوام کو چاہیے کہ وہ احتیاطی تدابیر پر عمل کریں تاکہ ان بیماریوں سے بچا جا سکے۔ وزیر صحت نے ایک بار پھر والدین اور بچیوں سے درخواست کی آپ اس مہم کی کامیابی کیلئے بڑھ چڑھ کر حصہ لیں، حکومت کا پیغام پھیلائیں، سروائیکل کینسر سے بچائو کی مہم میں آپ بھی بھر پور آگاہی دیں۔
– Advertisement –
