– Advertisement –
اسلام آباد۔15ستمبر (اے پی پی):صدرِ مملکت آصف علی زرداری نے کہا ہے کہ جمہوریت ہی وہ نظام ہے جو شہریوں کو بااختیار بناتا ہے، بنیادی حقوق کا تحفظ کرتا ہے اور سیاسی، معاشی و سماجی شمولیت کو فروغ دیتا ہے، پاکستان کی سب سے بڑی جمہوری کامیابی 1973 کا آئین ہے جو مساوات اور انفرادی آزادیوں کی ضمانت فراہم کرتا ہے اور قومی یکجہتی کے فروغ میں کلیدی کردار ادا کرتا ہے۔عالمی یومِ جمہوریت کے موقع پر اپنے پیغام میں صدر مملکت نے کہا کہ جمہوریت صرف ایک عمل نہیں بلکہ ایک نظریہ ہے جو رواداری، مخالف آراء کے احترام اور انفرادی و اجتماعی حقوق کے تحفظ کو یقینی بناتی ہے۔
انہوں نے کہا کہ پاکستان کی سیاسی تاریخ آزمائشوں سے بھرپور رہی ہے لیکن اسے ہمیشہ دوراندیش قائدین کی رہنمائی حاصل رہی ہے جن میں شہید ذوالفقار علی بھٹو اور شہید محترمہ بینظیر بھٹو نمایاں ہیں، جن کی قربانیوں نے جمہوری اداروں کی بحالی اور استحکام کی بنیاد رکھی۔ انہوں نے کہا کہ ان رہنماؤں کا ورثہ ہمیں جمہوری اقدار کے تسلسل کی جدوجہد کی یاد دلاتا ہے،
– Advertisement –
صدر مملکت نے پارلیمنٹ کے کردار کو اجاگر کرتے ہوئے کہا کہ یہ ادارہ عوام کی آواز کا نمائندہ، قومی پالیسیوں کا معمار اور عوامی مسائل کے حل کا بنیادی ذریعہ ہے۔ انہوں نے کہا کہ پاکستان کی سب سے بڑی جمہوری کامیابی 1973 کا آئین ہے جو مساوات اور انفرادی آزادیوں کی ضمانت فراہم کرتا ہے اور قومی یکجہتی کے فروغ میں کلیدی کردار ادا کرتا ہے۔انہوں نے زور دیا کہ موجودہ چیلنجز کا مقابلہ کرنے کے لیے آئین میں درج جمہوری اقدار، آزادی، سماجی انصاف، مساوات اور قانون کی حکمرانی کو مضبوطی سے تھامنا ہوگا۔
انہوں نے کہا کہ صرف جمہوری نظام کے ذریعے ہی مساوات، سماجی و اقتصادی انصاف، اظہارِ رائے کی آزادی اور قانون کی بالادستی کو یقینی بنایا جا سکتا ہے ۔صدر مملکت آصف علی زرداری نے کہا کہ آج ہمیں اپنے جمہوری اداروں کو مزید مضبوط بنانے، مؤثر اصلاحات کرنے اور اجتماعی طور پر جمہوریت کے استحکام کے لیے کام کرنے کی ضرورت ہے۔ انہوں نے اس عزم کا اظہار کیا کہ جمہوری اقدار کے فروغ اور تحفظ کی جدوجہد جاری رکھی جائے گی تاکہ جمہوریت ایک مضبوط، بااختیار اور جامع پاکستان کے لیے رہنما قوت بنی رہے۔
– Advertisement –
