ایپل نے گزشتہ روز اپنی سالانہ تقریب کے دوران نئی مصنوعات متعارف کرادی ہیں جن میں آئی فون 17 سیریز، نیا آئی فون 17 ایئر، ایئرپوڈز پرو 3 اور نئی واچز شامل ہیں۔ یہ ڈیوائسز 19 ستمبر سے مارکیٹ میں دستیاب ہوں گی۔
اس بار سب سے زیادہ توجہ آئی فون 17 ایئر پر رہی، جو اب تک کا سب سے پتلا آئی فون ہے۔
رائٹرز کے مطابق ایپل کا سب سے پتلا فون ”آئی فون 17 ایئر“ جس کی موٹائی صرف 5.6 ملی میٹر ہے۔ اس کی قیمت 999 ڈالر رکھی گئی ہے۔ یہ فون طاقتور A19 پرو پروسیسر کے ساتھ آتا ہے اور صرف eSIM کو سپورٹ کرتا ہے۔ یہ چار رنگوں میں دستیاب ہوگا: اسپیس بلیک، کلاؤڈ وائٹ، لائٹ گولڈ اور اسکائی بلیو۔
معمول کا آئی فون 17 اب 6.3 انچ بڑی اسکرین اور 120 ہرٹز ڈسپلے کے ساتھ آئے گا۔ اس میں 48 میگا پکسل کا نیا کیمرہ اور بہتر فرنٹ کیمرہ دیا گیا ہے۔ فون کا اسٹارٹ بیس ماڈل 256 جی بی اسٹوریج کے ساتھ ہوگا۔
پرو ماڈل کی قیمت 1,099 ڈالر سے شروع ہوتی ہے۔ اس میں نئی ایلومینیم باڈی، طاقتور کیمرہ سسٹم اور بہتر کولنگ ٹیکنالوجی دی گئی ہے تاکہ ہیوی گیمز یا کام کے دوران فون زیادہ گرم نہ ہو۔ پرو میکس ماڈل میں 2 ٹیرا بائٹ تک اسٹوریج دستیاب ہوگی۔
ایپل کے نئے ایئرپوڈز زیادہ بہتر نوئز کینسلیشن کے ساتھ آتے ہیں۔ ان میں دل کی دھڑکن چیک کرنے کا فیچر اور لائیو ٹرانسلیشن بھی شامل ہے۔ ایک چارج پر 8 گھنٹے چلتے ہیں۔ قیمت 249 ڈالر رکھی گئی ہے۔
ایپل نے نئی واچز بھی متعارف کرائی ہیں جن میں واچ سیریز 11 (399 ڈالر)، ایس ای 3 (249 ڈالر) اور الٹرا 3 (799 ڈالر) شامل ہیں۔ نئی واچز میں بلڈ پریشر الرٹ اور سیٹلائٹ کنیکٹیویٹی جیسے فیچرز دیے گئے ہیں۔ تاہم بلڈ پریشر والا فیچر ابھی امریکی ادارے کی منظوری کا منتظر ہے۔
