واشنگٹن : امریکی میگزین فارن افیئرز نے اپنی تازہ رپورٹ میں اعتراف کیا ہے کہ امریکہ کی بھارت پر انحصار کی پالیسی ناکام ہو چکی ہے اور اب پاکستان کو خطے میں زیادہ قابل اعتماد شراکت دار مانا جانا چاہیے۔
رپورٹ میں کہا گیا ہے کہ بھارت کبھی بھی امریکہ کا بھروسا مند اتحادی نہیں رہا اور واشنگٹن کی توقعات پر پورا نہیں اترا۔ اس کے برعکس، پاکستان نے دہشت گردی کے خلاف موثر اقدامات کیے ہیں اور بھارت کے ساتھ کشیدگی کم کرنے کی کوششوں میں بھی مثبت کردار ادا کیا ہے۔
فارن افیئرز نے امریکی صدر ڈونلڈ ٹرمپ کی تعریف کی کہ انہوں نے پاکستان کی کوششوں کو سراہا ہے اور تجارتی و توانائی معاہدوں کو دونوں ممالک کے لیے فائدہ مند قرار دیا ہے۔ رپورٹ میں خاص طور پر ریکوڈک جیسے منصوبوں میں امریکی سرمایہ کاری کو خطے کے استحکام کے لیے اہم قرار دیا گیا ہے۔
پاکستان کی نئی قومی سلامتی پالیسی میں امریکہ اور چین کے ساتھ متوازن تعلقات کی اہمیت کو بھی اجاگر کیا گیا ہے اور کہا گیا ہے کہ پاکستان ماضی میں دونوں ممالک کے درمیان پل کا کردار ادا کرتا رہا ہے۔
آخر میں رپورٹ میں خبردار کیا گیا ہے کہ اگر امریکہ بھارت پر اپنی توجہ برقرار رکھے گا تو اس سے نہ صرف پاکستان دور ہوگا بلکہ واشنگٹن کی خطے میں پوزیشن بھی کمزور ہو جائے گی۔
