اسلام آباد:وفاقی حکومت نے اسلام آباد اور راولپنڈی کے درمیان جدید اور تیز رفتار ٹرین چلانے کا فیصلہ کیا ہے، جسے جلد از جلد مکمل کرنے کے لیے وفاقی وزیر داخلہ محسن نقوی اور وزیر ریلوے حنیف عباسی نے اتفاق کیا ہے۔پیر کو دونوں وزرا کی زیر صدارت اجلاس میں مارگلہ سٹیشن اسلام آباد سے راولپنڈی صدر اسٹیشن تک ریلوے منصوبے کو جلد مکمل کرنے پر زور دیا گیا۔ منصوبے کے فریم ورک ایگریمنٹ پر آئندہ ہفتے دستخط ہونے کا امکان ہے۔
اعلامیے کے مطابق، اس تیز رفتار ٹرین کے ذریعے اسلام آباد اور راولپنڈی کے درمیان سفر صرف 20 منٹ میں مکمل ہوگا، جس سے وقت اور ایندھن کی بچت ہوگی اور ٹریفک کے دباؤ میں بھی کمی آئے گی۔
اجلاس میں یہ فیصلہ بھی کیا گیا کہ وزارت ریلوے ٹریک فراہم کرے گی جبکہ ریل سروس کا انتظام کیپیٹل ڈویلپمنٹ اتھارٹی (سی ڈی اے) سنبھالے گی۔ اس کے علاوہ جدید ٹرین امپورٹ کرنے پر بھی اتفاق ہوا ہے۔
وزیر ریلوے حنیف عباسی نے کہا کہ یہ منصوبہ جڑواں شہروں کے درمیان سفر کو آسان اور تیز تر بنائے گا اور عوامی فلاح کا بہترین اقدام ہوگا۔
وزیر داخلہ محسن نقوی نے کہا کہ یہ منصوبہ وزیراعظم کے عوامی ریلیف کے وژن کا عملی اظہار ہے اور اس کی تکمیل سے ہزاروں شہریوں کو معیاری اور جدید سفری سہولیات میسر آئیں گی۔
