Punjabi Cultural Day Celebratedv

پولیس دی رکاوٹاں دے باوجود لہور وچ پنجابی رہتل دیہاڑ منایا گیا

پنجابی کلچرل ڈے دِیاں رَنگا رَنگ تقریبات، ہر پاسے جیوے پنجاب دے نعرے

پنجابی سال دے پہلے دن‘ پہلی چیتر‘ 14 مارچ نوں جتھے کرونا دِیاں پابندیاں تے لاک ڈائون دے نویںدور دا مڈھ بجھا‘ اوتھے پنجابیاں نے پنجابی کلچر دیہاڑ منا کے ثابت کر دتا کہ وباواں تے پابندیاں عارضی ہوندیاں نیں جد کہ پنجابی زبان‘ پنجاب تے پنجابی کلچر ہمیشا جیوندے رہن والیاں چیزاں نیں۔

پولیس دی رکاوٹاں دے باوجود لہور وچ پنجابی رہتل دیہاڑ منایا گیا 1
پروگرام دے مُڈھلے سپانسر الکبیر ٹائون ڈویلپرز دے جی ایم سیلز اینڈ مارکیٹنگ خرم شہزادہوراں اپنی پوری ٹیم نال رَلت کیتی تے اوہناں نوں پگ وی پوائی گئی

پنجابی کلچر دیہاڑ مناون واسطے پنجاب سرکار نے جہڑے پروگرام رکھے ہوئے سن اوہناں وچ پنجاب دے وزیر اعلیٰ عثمان بزدار نال اک اکٹھ وی شامل سی۔

پولیس دی رکاوٹاں دے باوجود لہور وچ پنجابی رہتل دیہاڑ منایا گیا 2
پولیس دی رکاوٹاں دے باوجود لہور وچ پنجابی رہتل دیہاڑ منایا گیا 3

عثمان بزدار ایدوں پہلاں بلوچی کلچر تے سرائیکی کلچر ڈے واسطے بہت سرگرم رہے‘ نرا سرائیکی کلچر واسطے ای لاہور شہر وچ اک کروڑ رُپئے توں ودھ قومی سرمایا ضائع کر دِتا گیا پر جدوں پنجابی کلچر دی واری آئی تاں ٹٹ گئی تڑک کر کے دے مطابق کرونا لاک ڈائون ہو گیا جہنوں بہانا بنا کے عثمان بزدار دا شو کینسل کر دتا گیا۔

پولیس دی رکاوٹاں دے باوجود لہور وچ پنجابی رہتل دیہاڑ منایا گیا 4

پنجابی پیارے اجہی صورتحال دا پہلاں توں ای اندازا لا بیٹھے سن جس پاروں اوہناں نے کلچر دیہاڑ نوں اپنی من مرضی نال مناون دا متا پکا لیا ہویا سی۔ لاہور الحمراء دے باہر برنی گارڈن ایس تقریب لئی پہلاں ای چن لیا گیا سی جتھے دو وجے دا ٹایم دتا گیا سی پر پنجابی پیارے ایدوں بہت پہلاں ای اوتھے کٹھے ہون لگ پئے سن۔ لگدا اے کہ پنجاب پولیس نوں ایتھے پنجابی اکٹھ نہ ہون دین لئی آکھیا گیا سی پر پنجابی سیوکاں نال اک چنگی جہی جھڑپ دے بعد پولیس پاسے ہو کھلوتی تے پنجابی کلچر دیہاڑ دے پروگرام لئی ہون والیاں تیاریاں نوں چپ چاپ ویکھدی رہی۔ سو پنجابی کلچر دیہاڑ دا مڈھ ای پنجابی سیوکاںولوں مزاحمت نال ہویا جو ایس گل دی علامت اے کہ پنجابی تحریک اپنی راہ دیاں رکاوٹاں دور کر کے ای کامیاب ہووے گی۔

پولیس دی رکاوٹاں دے باوجود لہور وچ پنجابی رہتل دیہاڑ منایا گیا 5

تقریب دا آغاز عارفانا کلام نال ہویا جدوںندیم باہو نے باباسلطان باہو دا کلام سُنایا۔ بابا گروپ نے ہیر وارث شاہ بہت ودھیا انداز نال پیش کیتی۔پنجاب دا لوک ناچ بھنگڑا وی پیش کیتا گیا۔ جھُمر،سمی،ماہیے،ٹپے تے گیت وی پیش کیتے گئے۔حاضرین ڈھول دی تھاپ اُتے جھومدے تے ’’جیوے پنجاب‘‘ دے نعرے بلند کردے رہے۔ پروگرام وچ رلت کرن والے بہت سارے لوکاں نے روایتی پنجابی لباس پائے ہوئے سن۔ سوانیاں نے پنجابی کرتا‘ جنی تے کھسے پائے جدوں کہ مرداں نے لاچے کرتے تے پگڑیاں ورتیاں۔ اکٹھ دی انتظامیا ولوں رلتیاں نوں پنجابی پٹکے وی پیش کیتے گئے۔پنجابی کلچر پروگرام وچ پرفارمنس واسطے مختلف ثقافتی ڈھانِیاں نوں دعوت دتی گئی سی۔ ڈھولاں دے ڈگے دے نال ہر پاسے پنجابی پیارے لڈیاں‘ جھمر تے دھمال پا رہے سن۔

پولیس دی رکاوٹاں دے باوجود لہور وچ پنجابی رہتل دیہاڑ منایا گیا 6

بھلا کون پنجابی اے جہڑا ڈھول دی اواز سُنے تے اوہدا دل نچن نوں نہ کرے۔ راجا یاسر ہمایوں‘ جو پنجاب وچ اعلیٰ تعلیم دے وزیر نیں‘ وی ایس تقریب وچ آئے ہوئے سن۔ اپنی گل بات وچ اوہناں نے پنجابی زبان دی وڈیائی دا ذکر کیتا تے آکھیا کہ پنجابی زبان نوں تعلیم وچ شامل کرنا ویلے دی ضرورت اے۔ جھنگ توں ظہور ہوراں دی ٹیم اچیچے طور آئی سی جد کہ بھنگڑا دی پرفارمنس لئی علی بخش ہوری اپنے گرپ سَنے اپڑے ہوئے سن۔ جتھے بابا گرپ نے ہیر گائیکی کر کے لوکاں دے من موہے‘ اوتھے فضل جٹ دی گائیکی وی بہت پسند کیتی گئی۔ ہور کئی گائیکاں نے وی اپنی فنی مہارت دا وکھالا کر کے داد کھٹی۔

پولیس دی رکاوٹاں دے باوجود لہور وچ پنجابی رہتل دیہاڑ منایا گیا 7

کئی موقعیاں اُتے سٹیج اُتلی پرفارمنس دے نال نال سامعین وی دھمال پاون تے ناچ کرن وچ ساتھ دیندے رہے۔ نال نال سنجیدا گل بات وی چلدی رہی۔پنجابی تنظیماں ولوں احمد رضا وٹو، راجا یاسر ہمایوں،بابانجمی،ذوالفقار راحت،خلیل اوجلہ،الیاس گھمن، جمیل پال تے قاضی طارق ، ندیم رضا سمیت پنجابی رہنماواںنے مدثر اقبال بٹ نوں پنجاب دی روایتی پگڑی پوائی۔ مدثر اقبال بٹ ہوراں اپنی گل بات وچ صوبائی وزیر برائے ہائر ایجوکیشن دی موجودگی وچ منگ کیتی کہ پنجابی نوں نصاب دا لازمی حِصابنایا جاوے تے پنجابی اخباراں نوں اشتہارات دا قانونی کوٹا دتا جاوے۔

پولیس دی رکاوٹاں دے باوجود لہور وچ پنجابی رہتل دیہاڑ منایا گیا 8

احمد رضا پنجابی نے پنجابیاں دے ایکے اُتے زور دتا تے آکھیا کہ اج دا اکٹھ پنجابیاں دے ایکے دا ثبوت اے جس پاروں لوک دُوروں دُوروں آکے پنجابی کلچر دے رنگ ویکھ رہے نیں پنجابی کلچر دے ون سونے رنگاں دا ذکر کردے ہویاں اوہناں نے آکھیا کہ سانوں پورے پنجاب دے کلچر دے ہر رنگ نال پیار اے‘ بابا نجمی ہوراں اپنا مشہور کلام سوہنے انداز نال سُنایا‘ جمیل احمد پال ہوراں آکھیا کہ اسیں چھے ہزار سال توں پنجابی‘ ڈیڈھ ہزار سال توں مسلمان تے تہتر سال توں پاکستانی آں‘ ایسے ترتیب نوں ساہمنے رکھاں گے تاں پنجابی زبان تے کلچر دا بچاء ہووے گا۔

پولیس دی رکاوٹاں دے باوجود لہور وچ پنجابی رہتل دیہاڑ منایا گیا 9

تقریب نال الکبیر ٹائون دی انتظامیہ توں وکھ نویں ٹیلیویژن چینل پی این این دے بیورو چیف ذوالفقار راحت دے نال نال پریس کلب دی نمایندگی کردے ہویاں قمر بھٹی نے وی خطاب کیتا۔ ایس تقریب وچ افضل ساحر‘ حافظ ممتاز تے علی عثمان باجوا ہوراں سٹیج سکتر دے فرض سوہنے ڈھنگ نال نبھائے۔

پولیس دی رکاوٹاں دے باوجود لہور وچ پنجابی رہتل دیہاڑ منایا گیا 10

اس خبر پر اپنی رائے کا اظہار کریں

اپنا تبصرہ بھیجیں