‘وزیراعظم عمران خان کل یا اتوار کو قوم سے خطاب کریں گے’ 1

‘وزیراعظم عمران خان کل یا اتوار کو قوم سے خطاب کریں گے’

اسلام آباد : وفاقی وزیر داخلہ شیخ رشید کا کہنا ہے کہ وزیراعظم عمران خان کل یا اتوار کو قوم سے خطاب کریں گے، ہماری کوشش ہے کہ معاملات افہام و تفہیم سےطے ہوجائیں۔

تفصیلات کے مطابق وفاقی وزیر داخلہ شیخ رشید نے اجلاس کے بعد میڈیا سے گفتگو کرتے ہوئے بتایا کہ وزیراعظم عمران خان کی زیر صدارت قومی سلامتی کمیٹی کااہم اجلاس وزیراعظم ہاؤس میں ہوا،اجلاس2گھنٹے جاری رہا ، مسلح افواج کے سربراہان اجلاس میں موجود تھے۔

شیخ رشید کا کہنا تھا کہ اجلاس میں موجودہ سیاسی اور امن وامان کی صورتحال پر تفصیلی غورکیاگیا اور مذاکرات سے متعلق رپورٹ پیش کی گئی، اجلاس میں فیصلہ ہوا حکومت کی رٹ اورامن وامان کوہرصورت قائم رکھا جائے گا۔

وفاقی وزیر داخلہ نے کہا کہ ہم نے پولیس کورینجرز کے ماتحت کردیا ہے، ہماری کوشش ہے کہ معاملات افہام و تفہیم سےطے ہوجائیں۔

ان کا کہنا تھا کہ کالعدم تنظیم کے احتجاج کے دوران 4پولیس اہلکار شہید اور 80 سے زائد زخمی ہوئے ہیں، پولیس کو رینجرز کے ماتحت کیا ہے، ممکن ہے میں اور نورالحق قادری کی دوبارہ ملاقات ہو۔

شیخ رشید نے مزید کہا کہ ہماری کوشش ہے کہ معاملات افہام و تفہیم سےطے ہوجائیں ، جو مذاکرات اور دستخط کئے ہم اس پر قائم ہیں، انھوں نے وعدہ کیا تھا کہ ہم جی ٹی روڈ کھول کر مرکز واپس جائیں گے ، ہم ان کے وعدے کے پورے ہونے کا ابھی تک انتظار کررہےہیں۔

وفاقی وزیر کا کہنا تھا کہ وزیراعظم عمران خان کل یا اتوار کو قوم سے خطاب کریں گے، وزیراعظم جو مؤقف بیان کریں گے وہی پوری قوم کا ہوگا۔

کالعدم تنظیم کے سوشل میڈیا اکاؤنٹس کے حوالے سے انھوں نے کہا کہ ٹی ایل پی کے واٹس گروپ انڈیا،ہانگ کانگ،جنوبی افریقہ ،جنوبی کوریا سےچل رہے ہیں، ایف آئی اے کو ان کی تحقیقات کی ہدایت جاری کردی ہیں، ان کے سارے سوشل میڈیا اکاؤنٹس باہر سے چل رہےہیں۔

شیخ رشید نے بتایا کہ سعد رضوی صاحب سے ابھی بات چیت چل رہی ہے ، ان کو مارچ روکنا چاہیے اور مذاکرات کے نتائج دیکھنےچاہئیں، معاملات خوش اسلوبی سے طے نہیں ہوتے تو میں کچھ نہیں کہہ سکتا ۔

وزیرداخلہ نے کہا کسی اورکے معاملات کو لائیو پیش کیا جائے گا تو میں بھی ٹوئٹر سیکھ لوں گا، لوگوں کی خواہشات کو لائیو خبریں نہ بنائیں۔

فرانسیسی سفیر کے حوالے سے ان کا کہنا تھا کہ ساری دنیا کو پتہ ہے فرانس کا سفیر یہاں نہیں ہے، فرانسیسی سفارتخانے کا سوال اسمبلی میں پیش کررکھاہے، مجھے پتہ ہے کہ اپوزیشن نہیں آئے گی اس لئے مسئلہ پھنسا رہے گا۔

شیخ رشید نے مزید کہا کہ یہ 7ویں بار اسلام آباد آرہے ہیں ، لوگوں کو تکلیف کیساتھ بڑے مسائل پیدا ہورہےہیں، ہم نے رینجرز کو آرٹیکل 147 کےتحت تعینات کیا ہے۔

وفاقی وزیر کا کہنا تھا کہ کوئی 59 تنظیمیں کالعدم ہیں اور وہ الیکشن بھی لڑرہی ہیں، ان تنظیموں کو جب بھی موقع ملتا ہے اسلام آباد کی طرف نکلتی ہیں، رینجرز کو پنجاب حکومت کی درخواست پر اختیارات دیئے ہیں۔

کالعدم تنظیم سے معاہدے سے متعلق انھوں نے کہا کہ جو معاہدہ لاہور کےمذاکرات میں کیا تھا اس پر قائم ہوں ، یہ بھی بیٹھتے ہیں تو فرانس کامعاملہ ہی ان کا بڑا مطالبہ ہے ، مذاکرات میں ابھی تک کوئی پیش رفت نہیں ہوئی، امید ہے رات کو میں اور نورالحق قادری پھر ان سے مذاکرات کریں۔

شیخ رشید کا کہنا تھا کہ ضروری نہیں کہ میڈیا پر ساری باتیں کی جائیں ، ہم چاہتے ہیں کہ قوم اور عوام کا کوئی نقصان نہ ہو۔

اس خبر پر اپنی رائے کا اظہار کریں

اپنا تبصرہ بھیجیں