fm-turkey-call-on-pm-imran-khan

ترکی کے ساتھ تعلقات مضبوط معاشی شراکت داری میں بدلنا چاہتے ہیں: وزیر اعظم

اسلام آباد: وزیر اعظم عمران خان نے کہا ہے کہ ہم ترکی کے ساتھ تعلقات مضبوط معاشی شراکت داری میں بدلنا چاہتے ہیں۔

تفصیلات کے مطابق آج وزیر اعظم عمران خان سے ترکی کے وزیر خارجہ نے ملاقات کی، ملاقات کے اعلامیے میں کہا گیا ہے کہ رہنماؤں نے پاک ترکی دو طرفہ تعلقات، علاقائی اور بین الاقوامی امور پر تبادلہ خیال کیا۔

وزیر اعظم نے سیاسی تعلقات کو مضبوط معاشی شراکت داری میں بدلنے پر زور دیا، انھوں نے تجارت، سرمایہ کاری، دفاع، تعلیمی اور ثقافتی تعاون میں فروغ کے عزم کا اعادہ بھی کیا۔

وزیر اعظم نے مقبوضہ کشمیر کے مسئلے پر ترکی کی مستقل حمایت کا شکریہ ادا کیا، وزیر اعظم نے امن کو بھارتی اقدامات سے درپیش خطرات پر روشنی ڈالی۔

وزیر اعظم نے افغانستان میں تنازع کے پُر امن حل کے لیے مثبت کردار پر بات کی اور کہا کہ فریقین کو جنگ بندی کے خاتمے کے لیے سمجھوتوں کی ضرورت ہے۔

وزیر اعظم نے اسلاموفوبیا سے نمٹنے کے لیے بھی کام کرنے کی اہمیت پر زور دیا، اور کہا حضورﷺ کے لیے عقیدت کو بہتر طور پر اجاگر کرنے کی ضرورت ہے۔

اس خبر پر اپنی رائے کا اظہار کریں

اپنا تبصرہ بھیجیں