dg-ispr-special-message-on-youm-e-takbeer

یومِ تکبیر : پاک فوج کا مملکت خداداد کو جوہری طاقت بنانے والوں کو سلام پیش

راولپنڈی : ڈی جی آئی ایس پی آر میجر جنرل بابر افتخار نے مملکت خداداد کو جوہری طاقت بنانے والوں کو سلام پیش کرتے ہوئے کہا پاکستان نے 23 سال قبل خطے میں طاقت کاتوازن بحال کیا۔

تفصیلات کے مطابق پاک فوج کے شعبہ تعلقات عامہ آئی ایس پی آر کے ڈائریکٹر جنرل میجر جنرل بابر افتخار نے یوم تکبیرکےموقع سماجی رابطے کی ویب سائٹ ٹوئٹر پر اپنے خصوصی پیغام میں کہا پاکستان نے 23 سال قبل خطےمیں طاقت کاتوازن بحال کرتے ہوئے جوہری طاقت کا مظاہرہ کیاتھا، مسلح افواج اور قوم اس خواب کو حقیقت بنانے والوں کوسلام پیش کرتی ہے۔

یاد رہے28 مئی انیس سو اٹھانوے قومی تاریخ کا ایک عظیم دن ہے، آج سے تئیس برس پہلے پاکستان دنیا کی ذمہ دار جوہری قوت کے طور پر سامنے آیا۔

بائیس برس قبل ایٹمی دھماکوں کے بعد پاکستان نے مسلم دنیا کی پہلی اور دنیا کی ساتویں ایٹمی طاقت بننے کا اعزاز حاصل کیا، ایٹمی دھماکے اس لیے کیے گئے کہ گیارہ مئی انیس سو اٹھانوے کو پوکھران میں تین بم دھماکے کرکے بھارت نے خطے کی سلامتی کو خطرے میں ڈال دیا تھا۔

بھارتی قیادت کی جانب سے ایٹمی دھماکے کے بعد پاکستان کو خطرناک دھمکیوں کا سلسلہ بھی شروع ہوا، ایک طرف بھارت دھمکیوں اور اسرائیل کی مدد سے پاکستان کی ایٹمی تجربہ گاہوں پرحملے کی تیاری کررہا تھاتو دوسری جانب مغربی ممالک پابندیوں کی دھمکی دے کرپاکستان کو ایٹمی تجربے سے بازرکھنے کی کوششوں میں مصروف تھے۔

اُس وقت کے امریکی صدربل کلنٹن نے بھی پانچ بار فون کرکے اس وقت کے وزیراعظم کو ایٹمی دھماکہ نہ کرنے کا مشورہ دیا جبکہ اس کے بدلے کروڑوں ڈالر امداد کی پیشکش بھی کی گئی۔ تاہم عالمی دباؤ کے باوجود حکومت نے اٹھائیس مئی کے دن پانچ ایٹمی دھماکے کرنے کا حکم دے دیا اور چاغی کے پہاڑوں پر نعرہ تکبیر کی گونج میں ایٹمی تجربات کردیئے۔

اس خبر پر اپنی رائے کا اظہار کریں

اپنا تبصرہ بھیجیں