baba-farid-ganj-shakar-urs-pakpatan

بابا فرید الدین گنج شکر کا عرس : بہشتی دروازہ آج کھلے گا

پاکپتن : حضرت بابا فرید الدین مسعود گنج شکر کے عرس کی تقریبات جاری ہیں، بہشتی دروازہ آج شب کھولا جائے گا، دربار کے اطراف سیکورٹی سے سخت انتطامات کیے گئے ہیں۔

تفصیلات کے مطابق پاکپتن میں حضرت بابا فرید الدین مسعود گنج شکر کے 779ویں سالانہ عرس مبارک کی تقریبات عقیدت واحترام سے جاری ہیں۔

عرس کی سب سے بڑی رسم بہشتی دروازہ آج شب کھولا جائے گا۔ محکمہ اوقاف کی جانب سے تمام تر انتظامات مکمل کرلیے گئے ہیں۔ پاکپتن کے ڈپٹی کمشنر رانا شکیل اسلم اور ڈی پی او فیصل مختار نے دربار کا دورہ کیا،

رسومات میں ختم خواجہ خواجگان، رسم قوالی، شکر مکھانے اور خاص تبرک تقسیم کیے گئے اس موقع پر ملک و قوم کی سلامتی، کورونا وباء کے خاتمے اور کشمیریوں کی آزادی کے لیے خصوصی دعائیں کی گئیں۔

رواں سال کورونا وباء کے پیش نظر دربار پر عرس کی تقریبات کا انتہائی محدود انتظام کیا گیا ہے اور دوسرے شہروں سے آنے والے زائرین کو عرس تقریبات میں شرکت کی اجازت نہیں دی گئی۔

عرس کے موقع پر پاکپتن پولیس کی جانب سے سیکیورٹی کے فول پروف انتظامات کیے گئے ہیں۔ ٹاؤن ہال سے لے کر مچھلی چوک تک عارضی اور لوہے کے گیٹ لگا کر مین بازاروں اور سڑکوں کو سیل کر دیا گیا ہے جبکہ پولیس کی بھاری نفری تعینات کی گئی ہے۔

اس خبر پر اپنی رائے کا اظہار کریں

اپنا تبصرہ بھیجیں